Algun siman pasa UPP a publica parti di e contracto entre Gobierno y PDVSA/CITGO  na unda nos a mustra cu PDVSA/Citgo tin e pregorativo pa duna ken cu e kier trabou y kita hende for di trabou na su santo antoho. Mientras cu 20 parlamentario a vota ciegamente na fabor.
Nos a tuma nota di e show, dia cu 100 badgenan a wordo duna na algun persona cu lo a haya trabou den e up-grader. Nos a pidi e ministernan concerni pa "SHOW US THE LIST", pa asina nos mira cuanto di e personanan aki ta Arubiano y tambe kico nan salario ta. Pero te awe nada y 21 parlamentario ta keda keto.
Tempo cu a negocia e contracto cu Coastal esaki a bai den un forma transparente y diligente. E tempo ey nos yuinan di tera a haya e oportunidad di por a haya trabow cu un bon pago y nan no mester a pasa den e situacion na unda e compania Coastal por a "hire & fire" na nan antoho manera ta e caso awor aki. E tempo ey tampoco tabata tin tanto incertidumbre y badabada manera ta e caso awor. Y ainda tin parlamentario di oposicion tin e pudor di bisa cu e contract di PDVSA/Citgo ta miho cu esun di tempo di Coastal. Y nos ta ripara cu tin 21 parlamentario ta para wak y ta keda keto.
Gobierno y algun miembro di Parlamento a defende bisando cu PDVSA/Citgo mester tene nan mes na e asina yama areglo di 80/20. Esta di cada 100 trahador 80 mester ta Arubiano y 20 por ta stranhero. Ningun por a mustra unda esey ta poni den e contract.  UPP sinembargo a cita parti di e contract cu ta bisa totalmente otro cos. Esta cu PDVSA/Citgo por dicidi unilateralmente cu e por tuma hende di afo, apesar cu tin Arubiano pa hasi e trabow y gobierno ta OBLIGA di permiti nan haci esaki. Pa ser exacto articulo 9.4 y articulo 12.2(b)(iv) di e contracto aproba y 20 parlamentario ta keda keto.

Recientemente un Arubiano cu tin un conocemento amplio di loke ta come y bebe den un refineria a wordo kita for di trabou sin ningun motibo valido. UPP tin e leve sospecho cu probablemente PDVSA/Citgo, a haci uso di e articulonan den e contract ariba menciona, pa "zomaar" kita un yiu di tera y di e forma aki habri e oportunidad pa por tuma un persona di afor den servicio. Y e compania di Mike de Meza, cu inicialmente a tuma e Arubiano aki den servicio, simplemente a cumpli cu e ordo di e multinacional aki. Ta cuanto Arubiano mas lo bira victima di e abuso aki? Nos lo warda te ora cu e baca hoga pa para cu e abuso aki?
Unda e derecho di nos hobennan Arubiano ta keda pa haya un empleo digno pa por cria nan famia? Y 21 parlamentario ta keda waak e otro banda y keda keto.

Gobierno ta papia continuamente con nan ta haci nan maximo esfuersonan pa crea empleo pa nos hobennan cu a studia sea aki na Aruba mes of den exterior. Con e gobierno aki por cumpli cu esaki si e mes ta hiba un maneho anti-Arubiano? Un maneho na unda ya caba despues di 3 aña un stranhero NO mester acudi na Departamento di Labor mas pa "toets" si tin Arubiano pa hasi e  trabou pa cual e stranhero tin permiso.  Y 21 parlamentario ta keda keto.

E consecuencia di e maneho devastador aki ta cu nos hobennan Arubiano cu a caba un estudio despues di 4 aña y kier subi mercado laboral, lo encontra un stranhero cu tin un permiso caba y kizas te hasta a trece casa y yiunan Aruba. Nan lo wordo nenga trabou cu argumentonan fofo manera cu nan ta "overqualified" of cu nan falta experiencia pa no admiti cu ya caba tin un stranhero cu probablemente lo a acepta tambe menos pago pa por keda aki.  Y toch ainda e gobierno hipocrita aki tin e pudor di propaganda cu e "young professionals" mester regresa nan pais. Y 21 parlamentario ta keda keto. 

UPP den gobierno lo percura pa hiba un maneho pro Arubiano (sea di nacemento of naturalisa) y lo bai back na e "Swiss-model". Cu un maneho estricto asina ey lo por garantisa cu nos hobennan por lo menos no mester competi cu esnan cu ya caba despues di 3 aña de facto ta "van rechtswege toegelaten".
Esaki ta e unico manera cu nos hobennan lo tin un empuhe pa sigui studia sea aki na Aruba mes of den exterior y cu e speransa cu lo por tin un trabou digno ta spere na su Pais sin cu e tin cu bay hiba un "unfair competion" cu otronan cu tin 3 aña of mas ta trahando cu permiso of a drenta e up-grader bou e "wurg-contract" entre Gobierno y PDVSA/Citgo. 

UPP si lo no laga personal/partidista prevalece riba  interes di e pais y su hendenan manera e 21 parlamentarionan ta haciendo awor aki.
UPP SI lo no keda keto. UPP SI lo pone interes di nos pais y nos hendenan na prome lugar.


9 di maart 2017

Booshi Wever
Lider UPP
Brazil 163

Expresionnan haci den e articulo aki no necesariamente ta refleha opinion di ArenaPoliti.co