Aruba ta ampliando su base di energia sostenibel pa produci coriente. Pa algún tempo por a mira cu e parke solar tabata yegando su punto final di construccion y instalacion, te cu siman pasa a haci e prome pruebanan exitoso. Diabierna atardi tabata asina leu cu a inaugura e compleho di panelnan solar, como parti di conferencia ‘Green Aruba – Europe Meets the Americas’.

Durante e ceremonia, cu a tuma lugar na e compleho dilanti di ‘Aeroperto Internacional Reina Beatrix’, a hiba palabra Prome Minister di Aruba Mike Eman, director di Elmar Robert Henriquez, Minister Ing. Mike de Meza, CEO di AAA N.V. James Fazio y invitado especial, President di Carbon War Room, Dr. Jose Maria Figuéres.

Minister de Meza a expresa su satisfaccion di por traha bou liderazgo di un visionario manera Minister President Mike Eman. Di su banda Premier Eman a gradici e curashi di inversionista y empresarionan envolvi den e proyecto den nomber di pueblo di Aruba. “No solamente nos ta mehorando e medio ambiente y e calidad di bida di Arubianonan, pero nos ta contribui na mehoracion di mundo,” Prome Minister di Aruba a expresa dilanti esnan presente.

Cu e ceremonia, a conclui e di tres dia di e conferencia importante ‘Green Aruba: Where Europe meets the Americas’. Delegadonan, incluyendo representantenan di varios paisnan LGO, rond di mundo, a mira di cerca e prome resultadonan concreto di e mision di sostenibilidad energetico cu Aruba a pone su dilanti.

Expresionnan haci den e articulo aki no necesariamente ta refleha opinion di ArenaPoliti.co