MEP A PIDI PA CONSULTA CU PUEBLO PROME, PERO AVP* A RECHASA E MOCION. 

SANTA CRUZ – Dia 23 di september 2014 a pasa pa historia como un dia scur pa nos pais, despues cu partido AVP a cambia e color blauw original di nos bandera y cambie den uno cu ta tira mas pa shinishi.  Y awor Pueblo di Aruba lo mira un otro color di bandera bula na nos Pais.

E argumento pa minister Otmar Oduber a cambia e bandera, ta cu e color original no ta wordo traha mas, y pesey a scohe uno cu ta yega mas cerca di dje. Y cu kier uniforma e color. Fraccion di MEP den Parlamento a opone fuertemente contra esaki, pa diferente motibo.

Nada contra e deseo pa bin cu un solo color, pero e color escohi no ta esun cu nos ta custuma cun’e, e ta tira hopi den shinishi y esey pueblo a desaproba. Scohe un color riba papel, ta diferente cu scohe un color cu mester waya den solo y biento fuerte.

E motibo principal pa vota contra e cambio di color ta pasobra e cambio aki a bay sin cu Pueblo a wordo debidamente poni na altura di esaki. E ta un necesidad berdad pa por tin un solo color di bandera, pero mas importante ta cu nos Pueblo wordo splica cu e color poni den ley ta diferente na e color di e bandera cu Pueblo ta custuma cune. Pa evita e sorpresa aki y sigur pa evita cu nos Pueblo ta wordo dividi riba un simbolo asina importante pa nos Pais manera nos bandera, Fraccion di MEP a presenta un mocion den Parlamento pa laga Pueblo duna su opinion prome cu Parlamento tuma un decicion pa haci cambio den e ley di bandera.

Den e mocion nos Fraccion a trece dilanti cu e tema di cambio di color di bandera ta un tema cu ta sumamente delicado den comunidad y alaves di embergadura grandi y fundamental. Parlamento aunke cu e ta representante di Pueblo den un asunto asina fundamental manera bandera di nos Pais no tin e autoridad pa tuma decicion di tal magnitud y fundamental asina cu ta toca identidad di un nacion. Un cambio asina fundamental mester por conta cu e opinion di nos Pueblo prome cu Parlamento aproba of desaproba e ley cu ta haci cambio den e color di nos bandera. Pesey den e mocion nos Fraccion a pidi pa pospone e votacion riba e cambio di ley te depues di consulta Pueblo riba e cambio di ley aki.

E mocion aki a wordo bari for di mesa pa e parlamentarionan di AVP. Nan kier a dicidi dictatorialmente riba e cambio di color, sin consulta cu pueblo prome. Asina aki e mayoria den Parlamento ta malusa nan poder di 13 asiento pa tapa e voz di Pueblo. Di e manera aki enves di busca un aceptacion den Pueblo pa e cambionan, ta trece mas divicion haciendo uso di e bandera cu mester ta simbolo di union den nos Pais, y awe nos mester mira cu dolor na nos curason un bandera cu tanto nos a stima, ta waya cu otro color.

Expresionnan haci den e articulo aki no necesariamente ta refleha opinion di ArenaPoliti.co