Den un entrevista Parlamentario sr. Guillfred Besaril e la elabora riba e aspecto di desempleo y permisonan di trabow. Parlamentario Besaril a declara lo siguiente:

"Mi a tuma nota den media local, cu tin un caso den corte entre e Minister di Labor y un corant local. E Minister encuestion a wordo fuertemente cuestiona pa su maneho riba tereno di Labor, specificamente relaciona cu permisonan di trabow duna. Mi remarce riba e caso ta masha simpel: "Tanten cu na Aruba tin desempleo, sin importa kiko e percentahe di desempleo por ta, esnan cu ta biba na Aruba mester ta na promer lugar!"

Mi ta lamenta cu no tin claridad riba e cifranan real di desempleo na Aruba. Segun e Minister di Labor, e cifra ta bow di 10%. Pero sin importa kiko e cifra exacto por ta, un cos nos tur por ta deacuerdo cune: "Tin desempleo na Aruba .... Punto!" Pa es motibo aki y den mi humilde opinion mi ta reitera cu e ta mas cu logico cu esnan cu ta bibá na Aruba ta na prome luga pa yena e vacaturanan cu tin disponibel den e mercado local.

Mi ta conciente cu den nos leynan di Admicion en combinacion cu e maneho riba tereno di Labor, tin espacio pa hasi excepcion por ehempel den caso cu na Aruba ta carece di e experticio. Exactamente e factor aki ta loke ta hasi e caso entre e Minister di Labor y e matutino en cuestion masha interesante. E matutino a publica diferente documento den su diferente edicionan. Un di nan ta caminda cu un persona femenino di apenas 20 aña di edad ta bini di afor y keda cla cu trabow den un periodo relativamente corto. Kiko por ta e experticio di e hoben aki? Otro ehempel presenta pa e matutino, ta e permiso duna na un persona cu ta bini di afor pa traha na Aruba como "Hardinero". No tin hende aki na Aruba mes pa hasi un trabow asina?

Ehempelnan asina ta masha doloroso pa esnan cu ta biba na Aruba y ta desemplea. Ta netamente ehempelnan asina ta hasi cu tin un disgusto cronico tanto serca esnan cu ta buscando un manera pa por pone un pida pan riba mesa pa nan famia y esnan cu ta pasa den calvario pa un permiso di Labor", Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co