E pueblo di Aruba lo bay mira un diferencia di e decoracion cu a wordo haci e aña'ki na e rotonde di Belgiestraat, den becindario di Containerhaven y Wendy’. Aruba Ports Authority (APA) y studiantenan di Juliana School, a adopta e rotonde grandi riba J.E. Yrausquin Boulevard y hunto nan ta percurando pa decora e rotonde cu un bunita tema di Pasco. Te ainda no tin fecha definitivo pa inauguracion, pero en todo caso e lo sosode den e proximo dos simannan nos dilanti, Erwin de Mey, di APA a segura.

E departamento Servicio pa Comunidad y Bario, conoci como Team BoBario, pa algun aña caba ta ehecuta e Proyecto di Pasco di Gabinete Mike Eman II pa fin di aña, unda cu ta promove e sentido comunotario door di incentiva organisacionnan den comunidad pa traha hunto cu studiantenan pa decoracion e 14 rotondenan cu tin rond di Aruba.

Erwin de Mey a splica cu e programa di  e anochi aki ta den man di gerencia di APA, mientras cu su persona a keda encarga pa coordina e proyecto di decoracion. E ta traha hunto cu sra. Mariellis Vargas di PP (Pink Petite) local contractor, Enriquez Arias di Enriquez Electro Hertz (cu a haci tur e trabou di coriente y conexion) y nan a haya ayudo tambe di Jose Jimenez pa e trabou di carpinteria. Esaki ta di tres aña cu e grupo ta traha hunto.

De Mey a splica cu a dicidi e aña'ki pa otro concepto, uno mas visual. A sinta hunto pa tres siman largo, evauando e diseño di ultimo añanan y di otro rotondenan, prome cu a tuma un decision ki diseño ta bini cune e aña'ki. Despues di basta buscamento, a logra haya un "slee" cu ta un imagen cu ta bini den mente ora cu ta papia di Pasco. Finalmente a haya uno suficientemente grandi pa wordo bon ilumina, cu por colga y ta wordo mira di leu. Ademas di e decoracionnan colga, mey-mey di e rotonde tin un pesebre cu ta bay haya su figuranan tambe na final. E grupo ta contento pasobra e trabou a bay basta lihe, mirando cu ta durante nan tempo liber ta haci e trabounan di decoracion durante e ultimo dos simannan. Anteriormente tabatin un kerstboom grandisimo y e trein cu ta pasa tur rond. Aworaki e decoracion ta mas visibel.

E parti di e grupo aki ta cla, awor falta e parti di Juliana School prome cu e wordo inaugura den e proximo dos simannan. De Mey a gradici tambe e funcionarionan di Servicio pa Comunidad y Bario cu a coopera cu e decoracion di e rotonde aki por a bira un realidad.

Diabierna, 24 di october, a inaugura e rotonde di Tanki Leendert cu a wordo adopta door di Padvinders y Subway.

Expresionnan haci den e articulo aki no necesariamente ta refleha opinion di ArenaPoliti.co