Kiko bo a priminti Hulanda pa scapa e di dos KB?

ORANJESTAD – Lider di oposicion sra. Evelyn Wever-Croes den un reaccion pa prensa a duna di conose cu awor si Prome Minister Mike Eman no por keda keto mas.
“Awor si Mike Eman no por sigi sconde, e debe e pueblo di Aruba un contesta. Pasobra cada biaha cu Mike Eman a duna Hulanda un consesion, el’a entrega parti di nos autonomia. Siman pasa aparentemente Hulanda a menasa di mand’e un di dos KB, y pa evita esey na ultimo momento Mike Eman lo a manda un contra oferta.

Prome cu esey Mike Eman tabata den un silencio hermetico y no tawata duna ningun comentario riba e topico. Asina lagando espacio pa mas speculacion y un tension enorme den comunidad.  Mike Eman su deber ta awor pa enfrenta su pueblo y splica pueblo ta kiko el’a priminti Hulanda atrobe, y cuanto di nos autonomia el’a bolbe duna Hulanda. Pasobra si nos wak bek desde cu Mike Eman a sinta na 2009, cada biaha cu el’a palabra algo cu Hulanda, nos a perde parti di nos autonomia. E protocol cu Donner na 2011, sigi pa e protocol di cooperacion, sigi pa e protocol di Diahuebs Santo na 2013, y culmina cu e cartanan di “geen bezwaar” na 2014. Den cada un di nan Mike Eman a compromete nos autonomia, y despues kier nenga cu el’a hasi’e. Ta pesey awor cu nos a tuma nota cu Mike Eman a manda un “contra oferta” pa Hulanda, e debe nos un splicacion kiko e contra oferta ey ta. Mike Eman lo ta den Parlamento e simannan venidero y nos lo presion’e te cu e duna transparencia. E ganjamento y manipulacion di Mike Eman mester stop for once and for all”, segun lider di MEP Evelyn Wever-Croes

Expresionnan haci den e articulo aki no necesariamente ta refleha opinion di ArenaPoliti.co