ORANJESTAD – Diamars 28 april Parlamento lo trata e presupuesto di Raad van Advies, y den e dianan siguiente e presupuesto di Pais Aruba pa 2015. Den e presupuesto di Raad van Advies a resalta cu Gobierno, despues di a busca confrontacion cu Hulanda, awor ta dirigi su misilnan riba Raad van Advies y Algemene Rekenkamer, y ta dirigi nan riba Parlamento tambe.

Diripiente, sin ningun motibo, awor Gobierno kier degrada e institutonan di estado y no kier pa referi na nan mas como “Hoge Colleges van Staat”, sino “Vast College van Advies”. Segun Gobierno, e terminologia nobo aki ta pas mas den su vision.

“Personalmente mi ta haya esaki un discusion absurdo. Puntra un studiante di ley den su prome anja, e ta bisabo cu Raad van Advies, Algemene Rekenkamer y Staten, tur ta ‘Hoge Colleges van Staat’. Asina nos tur a sinja, asina e ta den tur pais di Reino y asina e intencion tabata desde principio. Cu Mike Eman awor diripiente kier cambia e cos aki, tin un motibo maligno su tras.

Mi por imaginami cu Mike Eman y su conseheronan ta rabia cu Raad van Advies tabata asina critico den e ultimo anjanan aki. Tambe mi por imaginami cu Mike Eman y su conseheronan tin un rabia cu den e prome KB, e conseho di Raad van Advies a wordo tuma over practicamente full. Pero esey no ta motibo pa awor bin bolter tur principio di derecho estatal. E ta mas bien un reaccion infantil, y ta parse un mucha malcria cu no ta haya su gusto. Nos NO ta acepta cu Gabinete Mike Eman kier degrada nos institutonan halto di estado. Nos di MEP lo para y defende integridad di Raad van Advies y Algemene Rekenkamer y nos ta exigi pa Mike Eman mustra nan respet. Es mas, nos di MEP ta insisti, mescos cu WODC, mescos cu CFT, mescos cu tur instanca internacional, cu nos institutonan halto di estado mester haya mas independencia pa por funciona mihor y asina garantisa democracia den un pais”, lider di MEP Evelyn Wever-Croes a duna di conoce.

Expresionnan haci den e articulo aki no necesariamente ta refleha opinion di ArenaPoliti.co