Finansas Publico y maneho di companianan estatal bou curatela 

ORANJESTAD -- Lider di MEP Evelyn Wever-Croes a duna su prome reaccion despues di a ricibi e protocol cu Mike Eman a firma cu Hulanda den fin di siman.
"Hulanda a tuma over finansas publico di nos pais, y lo no lag'e bai te ora Aruba cumpli cu e normanan internacionalmente acepta, manera MEP a lag'e na 2009.
E protocol ta stipula den punto 3 cu Mike Eman mester bin cu medida, despues mester pasa un ley pa regla e supervision financiero di Aruba, y e ley ey no por wordo cambia sin aprobacion di Hulanda.
Aruba mas tarda 1 di augustus lo conose su propio CFT tanten cu Mike Eman ta na mando, pa pone finansas na ordo bek. Una bes Eman por finansas na ordo, Aruba ta haya su autonomia bek y mester bin cu su propio supervision.
Hecho ta cu si Mike Eman a maneha e pais aki drechi, awe nos no tin e CFT pa Aruba.
Tambe na final di e Protocol por lesa cu Hulanda a tuma over tambe pa cu e companianan estatal, pasobra e fiesta di nombracion y di saca dividendo mester caba.
Ta un dia scur den historia di nos pais. E mesun persona cu 9 luna pasa a bisa "CFT over my dead body", a bai den welga di hamber, a invita tur militar bin baha riba dje, a bisa cu e lo muri pa nos autonomia, awe ta hopi satisfecho cu a entrega nos autonomia, y hasta kier pa hende felicit'e. Nos ta rabia y indigna, pero e cos aki no ta keda akinan. Presidente di Parlamento a coopera pa scapa cara di e Prome Minister, door di duna nos apenas dos minuut pa hasi pregunta. Esey awor ta forsa nos pa pidi un reunion publico urgente pa debati riba e tema aki, pasobra Mike Eman no por kere cu e ta entrega nos autonomia, y cu cos ta keda asina", lider di MEP a duna como su prome reaccion.

Expresionnan haci den e articulo aki no necesariamente ta refleha opinion di ArenaPoliti.co