Guest-columnist sr. Paolo Petrocchi ta comparti su opinion riba e ley di CAft (supervision financiero) cu lo wordo trata den Parlamento dia 27 di augustus 2015. 

29 aña despues di a realisa nos Status Aparte, e pregunta ta keda: Aruba ta cla pa ta “baas den nos mesun cas”? E ta obvio cu como Rubiano nos kier contesta e pregunta akinan cu un SI profundo. Pero e realidad di bida ta cu 29 aña di historia a mustra cu como Rubiano, nos a desplega un irresposibilidad tremendo pa cu nos finansas publico. E realidad di bida aki a culmina cu Diahuebs awor, nos Parlamento tin di bay vota si ta entrega parti di nos Status Aparte, of no.

A dura nos 60 aña pa a logra nos Status Aparte. E lucha cu a cuminsa bao Shon A. Eman y a culmina cu Betico Croes, a dura un tiki menos cu mitar di e tempo cu e lucha mes a dura pa desmantela e fabrica cu a forma nos Status Aparte. Esaki ta algo di lamenta, profundamente. Siendo relativamente hoben, naci na 1986, dificilmente mi por imagina bida na Aruba promer cu nos Status Aparte. Pero di otro banda, cu e generacion eynan a uni pa logra algo asina grandi, ta duna’mi un bista di con e pensamento e tempo eynan tabata, y probablemente tambe e tipo di lidernan politico cu nos tabata tin.

E pregunta mas grandi e siman aki ta bay ta si e organo legislativo mas grandi di Aruba, esta nos Parlamento, tin di vota pro of contra e ley di CAft. Como Rubianonan orguyoso di e lucha cu nos antepasadonan a hiba, probablemente un voto “contra” lo ta esun mas facil cu ta bin den mente. Pero mi ta kere cu nos tin di entretene e idea pa vota “pro” cu hopi seriedad.

Na 2014, Minister Hulandes di Relacionnan di Reino, esta Ronald Plasterk a bisa: “als er nu niet wordt ingegrepen, vraagt men zich in de toekomst af of iedereen heeft zitten slapen toen Aruba afstevende op de randen van de rotsen.” Esaki ta loke a defini 2014 p’ami y e idea pakico ami ta sostene un voto “pro” e ley di CAft. Con dificil cu e por ta pa nos por accepta, nos tin di realisa cu e situation financiero di Aruba ta uno catastrofico y no-sostenibel. Mi ta compronde cu sosteniendo un voto “pro” por categorisa’mi como un traidor di pueblo, un criminal, y un bendedor di patria. Honestamente, mi ta prefera bo yama’mi un bendedor di patria, paso esey nifica cu ainda nos tin algo na nos nomber cu ta valioso. Si nos sigui e rumbo cu nos ta bayendo awor aki financieramente, tur loke ta valioso pa nos lo cay den mannan di banconan international unda nos debenan ta mara.

Awor ken nos tin di culpa. Facilmente nos por punta dede riba Gabinete Mike Eman II como cu nan ta na mando awor. Pero esey ta nos problema; nos ta incapacita pa pensa criticamente y kier escoge e contesta mas facil y mas obvio. Otronan por pensa cu e culpa ta e dos gobiernonan di MEP den añanan 2000. Di unda ami tin conocemente politico den cua ami a biba aden, esaki por ta un contesta facil tambe. Pero mi ta kere cu e ta mas cu esey. Mi ta kere cu despues di 1986, nos como Rubianonan a wak nos Status Aparte como un regalo di Betico Croes (y tur esnan cu a lucha p’e) y no como un responsabilidad. Nos a laga e bandera bira zwak keriendo cu nos fundeshi tabata uno cu ta fuerte suficiente y nos a kere den un futuro stabiel den e crecemento economico cu Aruba a conoce despues di 1986. E simpel hecho cu e fecha di independencia di 1996 mester a wordo geschrap, a mustra cu di comienso caba, Aruba tabata tambalia pa para riba su mesun pia y pa ta “baas den mesun cas.” E ta facil pa integrantenan di MEP splica cu na 2008 40 cent di cada florin a bay pa paga debe y cu na 2015 esey ta 80 cent di cada florin; pero nos tin di realisa cu 40 cent di cada florin caba ta un suma barbaro y no-sostenibel. Pero ken ta di culpa e ora?

Con dificil cu e por ta pa nos accepta, nos tin di para keto un rato, stop di gara na nos prestigio y admiti cu como pueblo, nos TUR a faya barbaramente. Paso como Rubianonan nos a tuma un actitud severamente docil pa cu nos gobernantenan. Nos a escoge nos gobernantenan no basa riba nan meritonan, pero riba qualidadnan triviaal: vota traditional (vota X paso mi famia ta vota X), vota basa riba promesa, vota pa esun mas popular, vota pa abilidad recreational (fiesta!). Cu nan a tuma e decicionnan incorrecto y a hinca Aruba den un abismo financiero, ta paso nos a eligi hendenan incapacita pa tuma un stoel den e organo mas halto di nos pais. Y esaki no ta un tendencia cu ta tipifica nos custumbernan di ultimo par di añanan, pero ta bisa hopi di e tipo di hendenan cu nos ta laga drenta Parlamento desde cu nos a haya nos Status Aparte…y awe nos tin di paga pa esey.

De hecho, ami ta sostene un voto na fabor di CAft, no paso mi ta confia Hulanda, pero paso mi ta desconfia nos mesun Parlamento. Mi no ta un politico. Mi ta un simpel Rubiano. Pero si ami kier cana na Aruba y ta orguyoso di yama mi mes “baas den mesun cas” mi realmente kier ta doño di mi mesun cas. Awor aki, e doño di mi cas ta banconan international y ami ta pagando un hipoteca cu dentro di poco mi no lo por paga mas. E no mester ta un berguensa pa pidi ayudo. Al contrario, nos mester mira esaki como un oportunidad pa renoba nos fundeshi, y traha un Aruba cu pilarnan aun mas fuerte cu esun estableci na 1986. Esaki tambe mester bira un “wake-up call” pa nos tur como Rubiano siña di errornan cu nos a cometi cu a causa cu awe Hulanda mester a interveni. A bira tempo nos bay renoba e "cas" aki pa asina nos por ta "baas" atrobe.

Expresionnan haci den e articulo aki no necesariamente ta refleha opinion di ArenaPoliti.co