Perspectiva Independiente without background 001

‘Prome nos purba drecha Reino Hulandes, ban drecha Aruba’

A22 Bestuurskantoor
Asiento22 | S01E01 
Columna cu ta encurasha participacion di ciudadano den asuntonan politico. 

No ta un secreto cu e structura di Reino Hulandes no ta ideal. Tampoco ta un secreto cu ultimo añanan Gobierno Hulandes ta ‘mete’ mas cu maneho di Aruba (y otro islanan den Reino Hulandes), y cu diferente partido politico Hulandes (cu basta asiento) ta prefera di deshaci di tur responsabilad pa cu e islanan.

Ta importante pa defende nos autonomia ora Gobierno Hulandes purba mina esaki. Tambe ta importante pa e maneho di Gobierno di Aruba no forma un debilidad cu ta haci Aruba vulnerabel pa mas ‘metemento’ door di Gobierno Hulandes. Hopi di nos ta di acuerdo cu Gobierno Hulandes no semper a actua corecto relaciona cu nos autonomia. Na mesun momento incidentenan manera e aanwijzing na 2014, introducion di supervicion financiero (2015) y nombracion di un gobernador nobo (2016) no a cay for di cielo. Den tur e casonan aki, apesar di no a sigui procesonan manera debe ser, Hulanda por a basa su actuacion riba fayonan den maneho di Gabinete Mike Eman. 
... e miho manera pa pone Gobierno Hulandes respeta Gobierno di Aruba ta door di goberna Aruba den un forma responsabel ...”

Mientras cu Gabinete Mike Eman I y II a haci relacionnan cu Hulanda y un maneho ‘na beneficio di Reino Hulandes’ un prioridad, un maneho ‘na beneficio di Aruba’ a laga di desea. Esaki ta haci Aruba su autonomia vulnerabel y tambe ta pone Aruba den un posicion zwak pa purba negocia y trece cambionan positivo den Reino Hulandes. Ademas mester ta cla cu e miho manera pa pone Gobierno Hulandes respeta Gobierno di Aruba ta door di goberna Aruba den un forma responsabel ehecutando un bon maneho. Esey ta ‘dwing af’ hopi mas respet cu p.e. laga nos prome minister core campaña den exterior pa yuda Reino Hulandes haya un asiento den conseho di siguridad di Nacionnan Uni.

Mas importante cu wordo respeta door di Hulanda ta cu e siguiente puntonan ta sirbi e interes di nos ciudadanonan.


Blowing Money Fast
Nos situacion financiero no ta uno responsabel. Baha y elimina e deficitnan presupuestario—y realmente cumpli cu esaki na fin di cada aña!—no ta mas cu un comienso. No lubida cu baha un deficit presupuestario y yega na un balanced budget no kiermen cu e debe nacional a baha.
Den nos situacion actual, sin paga bek parti di e debe mes, nos ta pagando riba 200 miyon Florin pa aña na interes di e debe nacional.
Yega na un balanced budget no ta suficiente. Un cambio mas drastico ta necesario.”

Nos debe nacional ta riba 80% di nos GDP, cual ta un peso mucho pisa pa un pais cu e capacidad economico cu nos tin actualmente. Gabinete Mike Eman ta bisa cu mester a inverti hopi pa stimula economia, pero mirando e cifranan di Banco Central relaciona cu economia di Aruba, e resultado ta un desapunto. E desapunto ey no ta un sorpresa considerando e presupuestonan di Gabinete ME I y II. Hopi “inversion” no ta duradero, entradanan no ta loke nan mester ta y mucho placa ta wordo gasta den formanan cuestionabel. Ta mustra cu ta mop cu cranchi habri; ta purba genera mas entrada door di introduci y aumenta impuestonan, pero e forma cu e fondonan ta wordo maneha ta haci cu e debe toch ta sigui crece. Tambe tin e proyectonan PPP manera e “green” corridor cu lo mester wordo paga bou di e siguiente cuater of mas gobernacionnan, asina poniendo mas peso financiero riba futuro generacionnan.
Yega na un balanced budget ta long overdue y no ta suficiente. Un cambio mas drastico den e maneho di fondonan publico ta necesario, y e esencia di e cambio mester ta den priorisacion.


Priceless | Salud, siguridad y enseñansa
Un “green” corridor, klinkers y fiesta ta bon pa campaña, pero hopi mas importante ta pa inverti mas den aspectonan inmaterial manera salud, siguridad y enseñansa. Inversionnan den e prioridadnan aki por tuma mas tempo pa mustra resultado y no ta mesun facil pa usa pa haya voto. Pero e beneficionan ta surpasa e balor di e placa cu bo ta inverti.
Un gobierno no mester warda riba pueblo pa vocifera y manifesta su preocupacion, pa inverti mas den siguridad. E intencion no por ta pa neglicia infrastructura tampoco, pero mester bin un miho balansa entre e diferente prioridadnan.
Actualmente e prioridadnan di Gabinete Mike Eman II ta mustra di ta pisa mucho den direccion di proyectonan cu lo yuda gana e siguiente eleccion, a costo di prioridadnan mas necesario pa bienestar di pueblo awo y den futuro.


Inmigracion 
Un bon maneho estricto pa inmigracion no ta nifica cu un pais ta discrimina esnan cu otro nacionalidad. As a matter of fact, pa un isla manera Aruba un maneho estricto ta necesario. Pensa riba e tamaño di Aruba. Pensa riba nos capacidad pa cuido medico, enseñansa, siguridad y nos mercado laboral. Poco poco mas hende ta realisa e impacto di e maneho mas ‘suave’ cu Gabinete Mike Eman a introduci. Loke ta mas preocupante ta e señalnan di corupcion cu dunamento di permiso. No lo ta prome biaha si Hulanda ‘mete’ den maneho pa loke ta trata inmigracion. Y papiando di señalnan di corupcion, otorgamento di tereno ta un otro asunto cu varios ‘incidentenan’ cuestionabel cu te ainda no a wordo aclaria debidamente. 
E deficiencia democratico na Aruba ta afecta e pueblo di Aruba hopi mas cu e deficiencia democratico den Reino Hulandes.”

Deficiencia Democratico
No tin duda cu tin un deficiencia democratico den Reino Hulandes. Pero no ban pretende cu na Aruba mes no tin un democracia deficiente. E deficiencia democratico na Aruba ta afecta e pueblo di Aruba hopi mas cu e deficiencia democratico den Reino Hulandes. Checks and balances tey riba papel, pero den practica ta un otro storia. Tin un falta substancial di transparencia y ministernan ta ‘get away’ cu esaki continuamente. Parlamento di Aruba, nos organo gubernamental mas halto, tin dificultad pa haya informacion for di Gobierno, strobando nan di haci nan trabou di controla Gobierno. Pero tanten cu un mayoria den Parlamento (lesa: fraccion AVP) tolera esaki, mucho no lo cambia. Nos sistema democratico por funciona bon si tin mas madurez politico den Gobierno y den Parlamento, y tambe si tin mas balansa politico entre ministernan y e parlamentarionan cu ta sostene Gobierno. Un otro opcion ta pa bin cu leynan nobo y cambia nos sistema democratico, pero pa logra esey mester tin boluntad bou di esnan den e posicion pa realisa esaki.
Ora ta trata di politica y gobernacion, ignorance is not bliss.”

Boluntad
Pa termina, un ehempel cu ta refleha e titulo: corectamente politiconan na Aruba continuamente ta reclama e falta di boluntad di Hulanda pa yega na un areglo di conflicto pa asuntonan di Reino Hulandes (geschillenregeling). Na mesun momento, pa motibo di un falta di boluntad aki na Aruba mes, Aruba ta e unico pais den Reino Hulandes sin un ley pa regula financiamento di partido politico. For di prome cu aña 2000 politiconan ta primintiendo di introduci un ley pa financiamento di partido politico.

No ta esnan den politica so mester demostra mas boluntad pa refocus nos prioridadnan. Ciudadanonan cu derecho di voto tambe mester tin e boluntad pa contribui na e cambionan necesario door di keda bon informa pa por forma bo propio opinion y vota consciente. No subestima e importancia di ta bon informa. Ora ta trata di politica y gobernacion, ignorance is not bliss.


Carlos Guiamo | Asiento 22
This email address is being protected from spambots. You need JavaScript enabled to view it.


Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.