{idkey=764b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5905-minister-juan-david-yrausquin-consistencia-desaroyo-sostenibel-y-oportunidad-igual-pa-tur-ciudadano-den-reino%3FItemid%3D101][title=Minister+Juan+David+Yrausquin%3A+%E2%80%98Consistencia%2C+desaroyo+sostenibel+y+oportunidad+igual+pa+tur+ciudadano+den+Reino%E2%80%99][desc=]}
Minister Juan David Yrausquin den su discurso pa Genootschap Nederland Aruba    

Den Haag  – Recientemente Genootschap Nederland Aruba a celebra su di cuater lustro. Un momento importante pa para keto un rato. Y pa e ocasion aki Minister Plenipotenciario di Aruba, Juan David Yrausquin, tambe tabata un di e oradonan cu a hiba un discurso pa comparti su experiencia y vision pa Reino. Alabes el a gradici Genootschap Nederland-Aruba pa su esfuerso y e trabou balioso na beneficio di un bon relacion y mantencion di contactonan den Reino.

Den su contribucion Yrausquin a comparti su experiencia personal cu Reino. Ela remarca cu e hecho cu Pais Aruba ta forma parti di Reino Hulandes tin mas bentaha cu desbentaha. Apesar cu den pasado e mes no tur ora a experiencia esaki asina. Ela splica cu na momento cu e tabata spera un Reino activo, esaki tabata pasivo. Y na momento cu e tabata spera un Reino pasivo, esaki tabata activo. Yrausquin tabata sinti falta di consistencia di parti di Reino.
Pesey tambe den su discurso Minister Yrausquin a boga pa un Reino consistente. Pero tambe pa un Reino activo y ambicioso; un Reino cu ta duna contenido y direccion na locual ta importante pa tur ciudadano den tur e cuater Paisnan cu ta forma parti di un Reino.

E Minister cu ta representa Aruba den Conseho di Minister di Reino a sigui splica cu Reino Hulandes ta e Estado soberano - y cu e Estado soberano aki ta consisti di cuater Pais. Pues Aruba, Curaçao, Sint Maarten y Hulanda hunto ta forma un Reino. Y tur ciudadano di e Reino aki tin e nacionalidad Hulandes. Tur ciudadano di Reino Hulandes tin e mesun derechonan.
Y den Reino Hulandes e Conseho di Minster di Reino ta e unico organo di maneho den cual tur e cuater paisnan di Reino ta bini hunto tur luna. E organo maximo di Reino Hulandes, den cual Aruba tambe tin su Minister Plenipotenciario cu ta forma parti di e organo di maneho aki. ‘E hecho cu ciudadanonan di tur e cuater paisnan tin e nacionalidad Hulandes y e hecho cu nos tur ta ciudadano di Reino Hulandes ta trece responsabilidadnan importante pa e organo di maneho di Reino. Tambe pa e rol cu Aruba tin den duna contenido na esaki.’

Yrausquin a sigui splica cu durante su shete lunanan como miembro di Conseho di Minister di Reino el a haya un miho bista di e posibilidadnan y e imposibilidadnan cu tin. Particularmente pa pais Aruba como miembro di e organo di maneho di mas halto den Reino.
Yrausquin a constata cu apesar cu e poder di Conseho di Minister di Reino ta de facto den man di e ministernan di Hulanda (principalmente e Minister President di Hulanda) tin oido pa argumentonan. Tambe ta duna hopi balor na un intercambio y un debate.

Si Aruba, y no djis su Minister Plenipotenciario, pero si e sosten cu ta ricibi di e aparato gubernamental completo, tambe ta bon prepara y ta bin cu proposicionnan cu Aruba ta aspira y ta persigui riba nivel gubernamental, administrativo y politico, Aruba por realisa esakinan tambe.
Tambe cu e Minister di Asuntonan di Reino riba su mes no tin mas poder cu e Ministernan di Aruba, Curaçao y Sint Maarten. Ta e organo den su totalidad como Conseho di Minister di Reino ta esun cu ta eherce e poder.

Minister Yruasquin: ‘Y ta den e constelacion aki Aruba mester duna contenido na e rol cu Conseho di Minister di Reino ta eherce. Aruba por trece proposicionnan balioso cu ta contribui na duna contenido riba nivel di Reino. Basa riba nos miho argumentonan.’ Sr. Yrausquin a enfoca riba e importancia di e rol aki pa logra realisa metanan comun, manera ‘Sustainable Development Goals’ (SDG’s). Y cu pa por hancra SDG’s riba nivel di Reino, pa por logra un desaroyo sostenibel den tur e cuater Paisnan den Reino na aña 2030 ta rekiri cambionan. ‘Cambionan necesario for di banda di Aruba, Curaçao y Sint Maarten tambe. Mirando cu tur Pais ta miembro di Conseho di Minister di Reino, pero cu den practica nos no ta enfocando riba e meta- y interesnan comun den Reino. Nos ta asumi cu e ministerio encarga cu Relacionnan di Reino lo percura pa esaki. Pero e ministerio di Relacionnan di Reino pa gran parti ta prepara e contribucion di Hulanda durante e reunionan di Conseho di Minister di Reino,’ asina e mandatario a bisa.

Segun Yrausquin ta importante pa riba nivel di Reino pone metanan comun cu ya ta estableci, cu ta incuestionabel y cu ya como Reino tur e cuater Paisnan a compromete nan mes na nan caba. ‘Metanan cu ya como Reino nos a mara nos mes na nan caba riba nivel internacional. Esaki ta e metanan di Nacionnan Uni pa realisa un desaroyo sostenibel, conoci como 'Sustainable Development Goals' (SDG's),’ asina ela enfatisa. Ela sigura cu tur ciudadano den Reino Hulandes tin derecho riba e mesun oportunidadnan y riba un desaroyo sostenibel. E ta convenci den e potencia comun pa logra realisacion di un desaroyo sostenibel pa tur cuater Pais den Reino.

Potret: Nico van der Ven

Expresionnan haci den e articulo aki no necesariamente ta refleha opinion di ArenaPoliti.co