Pueblo di Aruba, no ta tur ora un minister su ideologia y plan ta esun cu mas lo beneficia e pueblo. Den e caso specifico cu gobierno di Aruba, representa pa minister Paul Croes, kier elimina e ley 1613X for di codigo civil. E motibonan di eliminacion ta pisa poco versus e consecuencianan. E motibonan ta 50-plussers, hobennan cu lo kier traha pa periodonan cortico, hobennan cu ta termina e leerwerk traject, hendenan cu ta saliendo di bijstand y mester un empleo y tur persona cu no tin trabao actualmente. Con absurdo y idiota esakinan ta zona pa bo? TUR ta posibel via e ley actual. Unda tin mester ta simplemente adapta e ley. Dicon mester aboli esaki totalmente?  E consecuencianan lo bay ta abuso total di poder door di empresarionan, pagonan inhusto y un sentimiento di ansha como trahador. E cherry riba e bolo di lodo di Paul Croes ta cu enberdad un catibo-trahador no por bay banco cu un contrato di 8 luna. E propio minister maton ta declara esaki tambe como muestra di impertinencia mayor! Otro punto di desviacion ta e declaracion cu Gobierno den esaki ta kere mescos cu e gremionan comercial AHATA, WAB, ATIA y SNBA cu cambio aki lo tin efecto positivo pa tur hende cu no tin trabao actualmente. Kens nan ta of ta kens nan ta kere cu e pueblo ta? Cua morto ta nenga bela? E gremionan comercial ta manera zamuro ta warda e ley 1613X wordo mata door di e minister maton, pa nan baha bin come. DICON no duna esnan sin trabao un trabao awor caba? Pakico warda te ora e ley pasa? P’asina haci y deshaci cu e trahador? Cu e ora ey por probecha moralmente y físicamente di e trahador? AHATA lo pone fiesta atrobe si esaki pasa! Manera esun na Occidental unda sr. Paul Croes a organisa den e ballroom un fundraising night como tema “Be Grateful”. Su rumannan tabata MC. Esaki si ta significa ser agradecido na e gremionan comercial, entregando nan e poder di ta un slave-driver moderno. E grupo aki no ta e mesun grupo cu a financia e campaña electoral di partido AVP? Incluyendo cierto banco tambe? Por ehempel CMB kende a sponser sr. Paul Croes en grande tambe lo probecha? Corda cu CMB a fia gobierno di Aruba mas cu 285 miyon florin den 9 prestamo cu un promedio di mas di 15 aña di duracion. Anto na un interes hopi halto mes pa cual Hulanda a declara cu esaki ta un bobedad di parti di gobierno di Aruba. Pasobra e otro islanan ta pagando un interes hopi mas abao cu esun di Aruba. Kiermen ta strica nan ta strica placa di e pagador di belasting na Aruba. Por cierto, awo bo sa unda bo placa ta bay. Pa corona e “bon trabao”, no obstante e 26 medidanan cu ta na caminda, cu ta CAFT y CFT ta manda, awor nan ta destrui e derechonan di e clase trahador tambe. Si e ley pasa e trahador a cambia tambe den un catibo-trahador. Pa esaki e 33.000 almanan a vota? E destruccion laboral aki tabata den e programa di gobernacion di AVP na 2013?

Awor e minister ta keda ‘wrong and strong’, declarando “lo mi presenta esaki na Conseho di Minister pa asina discuti y finalmente manda esaki Parlamento di Aruba pa vota ariba”. Conseho di Minister lo desaproba esaki? Parlamento den su mayoria (AVP) lo vota contra? Cuanto klinkers e abuso aki bal?
Aruba esaki ta e consecuencia di vota pa ken cuta, concecuentemente e ora ta ken cuta ta goberna y con cuta! DIOS spaar Aruba.

Expresionnan haci den e articulo aki no necesariamente ta refleha opinion di ArenaPoliti.co