E reorganisacion di e aparato di gobierno ta un tema cu ta haya mucho poco atencion. E ta wordo discuti den comunidad ora hende haya mal servicio of ora nan wak of lesa algo malo di un of otro departamento. Empleadonan publico incorectamente ta wordo mira como hende cu no ta traha suficiente pa e salario y beneficionan cu pueblo ta paga pa nan. E aparato ta wordo mira como mucho caro y ineficiente. Aunke mester reconoce erornan cu tin y e costo halto di operasion di e aparato di gobierno, ta incorecto pa haci comosifuera ta henter e aparato no ta sirbi. Esey ta simpelmente incorecto. E aparato di gobierno ta duna un sin fin di servicio y haci un cantidad di trabou cu niun otro instancia por of kier haci. Aparato di gobierno ta haci un cantidad di cos sin cobra e cliente, pero e costo ta wordo paga door di gobierno. Pesey, mester atende cu e problemanan cu tin den aparato di gobierno di otro forma, sin prehuicio of acusacion incorecto. Pasobra un aparato di gobierno cu ta duna bon servicio den un forma eficiente, cu ta funciona sin duda di su integridad, cu ta confiabel y ta traha sin wak color politico, cu ta actua profesional y punctual, ta na beneficio di nos pais, di operasion di gobierno y di e trahado mes. Pone aserca cu e aparato mester ta pagabel awor y den futuro y cu empleadonan publico mes por traha y biba orguyoso di ta empleadonan publico, anto nos tin e ingredientenan pa un aparato di gobierno pa futuro cu nos tur kier pa nos pais.

REORGANISACION
Pa haya e miho servicio, mas punctual y mas confiabel, mester inverti den profesionalisacion di e personal. E costonan di esaki ta halto, pero lo wordo compensa door di e aumento di eficiencia, efectividad den trabou y e uso mas miho di e automatisacion di hopi trabou den e aparato. Aumenta eficiencia ta nifica tambe cu ta elimina tur forma di gasto innecesario of cu no ta duna resultado desea. E resultado final semper mester ta, miho servicio, na menos costo y tanto empleadonan como comunidad mester keda satisfecho.
Te awor aki gobierno no a haci mucho renobacion of reorganisacion den aparato di gobierno. Te awor gobierno a concentra riba stimula economia, crea cupo di trabou nobo, sanea fondonan social y sania finansa publico. Pero pa sigui balansa finansa publico y garantisa comunidad servicionan essencial, mester haci e aparato mas eficiente y pa menos costo. E reoganisacion di aparato di gobierno lo mester sigura cu tur servicio essencial ta continua. Door di segura continuidad di servicio y haci tur trabou mas eficiente, lo baha gasto di gobierno den forma structural y contribui na finansa publico balansa den futuro. Na mes un momento lo sigura henter comunidad mas y miho servicio y mantene e funcion di empleado publico cu honor.

Expresionnan haci den e articulo aki no necesariamente ta refleha opinion di ArenaPoliti.co