Manera nos a indica caba den comunicadonan anterior AVP a hiba un maneho laboral hopi negligente, anti local & hoben y pa corona e obra tambe contradictorio. E practica aki lastimamente a continua na 2014 y 2015 na man di Minister actual di Labor sr. Paul Croes. Sin duda algun e ta di lamenta pasobra ta kita oportunidad di esnan local y otronan cu a hasi di nos pais nan hogar estableciendo nan mes kinan pa por ehempel importa trahador. Minister di Labor por wel di ripiti mil biaha mes cu su meta ta pa baha desempleo pero e realidad ta uno contradictorio y ta desenmascare. A base di informacion ricibi riba contestacion di preguntanan en conexion cu presupuesto 2016 nos lo splica pueblo den detayes e asunto aki.

Otorgamento di permiso no solamente ta limita e oportunidadnan di esnan local pero tambe ta trece contradiccion den e maneho di e Minister. E semper a vocifera cu e ta comprometi pa baha desempleo pero e realidad ta poco conflictivo. Nos por a constata cu na aña 2014 a drenta un total di 584 peticion (eerste aanvraag) pa importa trahador di cual 433 a wordo aproba y otorga. Esaki ta ekivalente na 74%. Mientras cu pa 2015 e practica aki a continua pasobra a aproba 392 di un total di 579 peticion cu a drenta ekivalente na 67.4%! ( mira anexo I) Apesar cu e lo por a baha e no ta kita afor di e hecho cu e ta conflictivo mientras bo tin un bestand di hopi hende sin trabou pero toch bo ta sigui hiba e maneho aki. E punto central di henter e asunto aki ta e hecho cu bo tin un bestand di esnan cu hayando bijstand, un bestand di departamento di progreso laboral di esnan desemplea, hobennan cu anualmente ta caba scol cu kier drenta mercado laboral y desempleo no-registra y toch bo ta sigui basha firma!

Pa fraccion di MEP por tawatin un bista cla di loke tin registra di esnan desemplea a pidi pa haya un overzicht reparti den categorianan di edad (anexo II) Ta incomprendibel cu por ehempel na aña 2014 bo tin un cantidad di 1443 persona sin trabou entre edad di 15 aña pa 34 aña pero toch ba otorga 433 permiso cu promer peticion. Si realisa e total di hobennan sin trabou ta representa 50.4% ! Mescos tambe aña 2015 tawatin un cantidad 1044 persona sin trabou pero tambe a aproba 392 promer peticion. Akinan e total di hobennan sin trabou ta representa 49.6%!

Pa un gobierno cu kier pretende di kier baha e % di desempleo e ta contradeci su mes totalmente! Con e ta posibel cu mientras bo tin un lista largo di 2844 (2014) y 2103 (2015) persona sin trabou toch ta keda importa trahador! Pa colmo ta papia di tin e hobennan central pero ta continua na kita oportunidadnan for di nan sin cu ta conta esnan cu ta caba scol anualmente! No solamente e maneho ta di lamenta pero e ta di condena cu ta continua cu importacion mientras ta trata di funcionan cu nos hendenan local por eherce. Cu tin biaha ta hasi excepcion pa cierto vacaturanan cu ta rekeri cierto nivel di educacion of profesionalismo ta comprendibel. Pero laga nos pone bon cla cu ta trata di trabounan manera di waiter, bartender, schoonmaker, cook, bewaker etc. Por mira anexo III pa un bista amplio di tur e trabounan cu mayoria parti tin necesidad pa yena.(fuente: rapport SER arbeidsimmigratiebeleid & werkloosheid 2014) Awor Minister sr. Paul Croes mester splica pueblo kiko ta e motibo cu esnan local no ta bin remarke pa haya trabou? Si e kier trata na hustifica su mes atrobe cu desempleo a baha esei sigur ta algo cu e no mester gaba cune pasobra ta su responsabilidad. Tampoco e ta impreshona nos cu su maneho pasobra ta varios ehempel nos a duna di un maneho negligente y accionan iresponsabel di su parti. Realidad ta cu e como hoben minister ta manipulando pueblo y cifranan presenta akiden ta muestra palpabel cu e no ta hibando un maneho optimal corda un maneho cu ta crea oportunidad pa esnan local cu ta sin trabou y kier drenta mercado laboral. Un cos ta sigur den realidad no tin compromiso pa logra baha desempleo na Aruba y e maneho laboral di Gabinete Eman ta contradictorio for di tempo cu e la tuma mando cual lastimamente a continua den 2014 & 2015 perhudicando nos hobennan y localnan!

Expresionnan haci den e articulo aki no necesariamente ta refleha opinion di ArenaPoliti.co