MEP TA CONDENA EXPRESION HOMO FOBICO DI POLITICO DI AVP. 

Partido AVP ta un partido cu berdad ta permiti tur cos. Un homber ta dal un muher, nada ta pasa. Un politico activo y consehero di minister ta chuercha di asesinato di 50 persona, nada ta pasa. E mesun politico ta insulta hendenan na forma masha bulgar, pa motibo di nan orientacion sexual, nada ta pasa. Ta increible cuanto cos ta pasa den e partido ey, y ningun accion ta wordo tuma.

Pero locual cu e politico di AVP a expresa den fin di siman, despues di e asesinato cruel di 50 persona na Merca, mientras cu 50 otro tabata lucha pa nan bida, ta algo totalmente inaceptable. Ta algo cu mester a wordo condena. 
Expresionnan anti homo sexual, na forma masha masha bulgar, ta muestra di e mentalidad di e politico, y si Mike Eman NO distancia su mes di e expresionnan ey, y si e no condena nan explicitamente, e ta tipifica e mentalidad di HENTER partido AVP!
E forma con e politico di AVP a purba saca su mes, door di culpa un otro hende cu lo a saca su expresion for di contexto, ta hasi e persona mas cobarde ainda. Grandi ta ora bo realisa bo eror, y admiti bo eror. Na momento cu bo ta culpa otro hende pa bo eror, bo ta demostra cu nunca bo tabata saincero den bo disculpa.

Hamas bo por yama bo mes un politico, si bo ta expresa bo mes di e forma ey, ni den joke.Na Mexico un alto funcionario a expresa su mes di e emsun forma, y a wordo retira imediatamente, y e gobierno local a distancia su mes di dje. Pesey ta incomprendible con Mike Eman ta tolera un persona asina riba su lista, y mas ainda, ta incomprendible con e politiconan di AVP ta permiti pa un persona asina sinberguensa, keda riba e lista. Si AVP tolera esaki, AVP ta mustra cu e ta un partido cu ta sostene odio!

Expresionnan haci den e articulo aki no necesariamente ta refleha opinion di ArenaPoliti.co