Tratamento di presupuesto 2017 a inicia e siman aki den parlamento… 

ORANJESTAD - Durante reunion publico, e siman aki, Minister di Finanzas, Angel Bermudez a debati den parlamento encuanto e presupuesto di 2017 di pais Aruba. Cu esaki e tratamento publico di e concepto di ley aki a inicia den Staten, mustrando un deficit di 27 miyon florin, cu ta cuadra cu e norma legal pa 2017.

Esaki ta representa 0,5% di nos GDP y segun e splicacion di e mandatario e cifra aki lo mester bolter den 2018 cu un surplus pa asina facilita Aruba cu e pago riba su debe nacional. E peso di gastonan di interes, AZV y personal tabata preguntanan di peso cu a keda relevante durante henter e reunion.

Minister Bermudez a splica cu e riesgo mas grandi pa futuro presupuestonan ta den AZV, ya cu e gastonan aki ta sigui aumenta anualmente. Pa loke ta trata e gastonan di interes esaki tambe ta substancial cu 15%, sin embargo esaki lo stabilisa cu eliminacion di e deficitnan, pa despues cuminsa reduci. Na mes momento e mandatario ta di acuerdo cu mester mantene supervision riba e gastonan di personal y mantene e paro riba reclutacion pa asina esaki keda domina.

E mandatario di finanzas a declara durante e tratamento di presupuesto ayera, cu e presupuesto aki ta realisabel, mescos cu esun di 2015 y 2016. Mientras tanto Minister Bermudez ta spera cu pa otro siman e presupuesto lo keda aproba den nos parlamento.

Despues di a entrega e cuenta anual di aña 2015 siman pasa, e concepto di ley di e cuenta anual tambe a wordo manda ayera oficialmente pa Parlamento, pues turesten e mandatario di finanzas ta keda pendiente pa e fecha pa su tratamento y na mes momento un presupuesto supletorio pa actualisa e presupuesto di 2016 tambe den parlamento, prome cu esaki bay cu reces.

Di e forma aki Minister Bermudez lo conclui e ciclo presupuestario, manera ley ta prescribi, pa prome biaha den e ultimo 30 aña.

Expresionnan haci den e articulo aki no necesariamente ta refleha opinion di ArenaPoliti.co