Partido Democracia Real como fraccion, kier introduci un cambio riba e “kiesverordening” pa bo por tene un referendum consultivo pareu  ora di tene eleccion. 

Kico ta pasa ta cu aki na Aruba ora di tene eleccion, ta un eleccion general bo ta bay cu un programa di partido pero bo no sa kico pueblo ta pensa, riba temanan specifico.

Na Merca y tambe na Hulanda ora bo bay electorado bo por consulta otro temanan di envergadura cu tin impacto riba pueblo, un of dos tema, e ora ey bo ta vota pa Parlamento, pero den otro check box bo ta vota pa otro temanan, anto bo ta haya un idea di kico pueblo ta pensa riba temanan specifico. 

Andin Bikker a subraya cu nomber di su partido ta Democracia Real, esey kiermen democracia participativo cu ta e principio cu nan ta para pe. 

E parlamentario y lider di PDR a expresa cu pueblo NO a nace 29 di februari, e no ta cada cuater aña mester consulta pueblo, pero pueblo constantemente mester wordo consulta, y por ripara cu cada eleccion cada cuater aña tur sorto di tema ta wordo hinca den un grabelton anto e ora ta bay eleccion cune. Pa bo por consulta pueblo debidamente mester bin un dimension di Ley di Referendum.

Bikker a splica cu e mihor manera pa hacie, pasobra un referendum ta costa placa, y ora bo bay eleccion pa print tur e cartonnan di voto y e organizacion eynan, tambe e tin un costo cune, anto ta mas eficiente pa hacie conhuntamente ora bo bay eleccion locual no ta exclui cu ora ta bin temanan cu entre tanto tambe ta merece un referendum, por haci esaki tambe. PDR ta studiando un concepto di ley pa cu e tematica akinan.

Expresionnan haci den e articulo aki no necesariamente ta refleha opinion di ArenaPoliti.co