Recientemente a sali den un medio di comunicacion, den e caso aki Noticiacla, cu Corte a duna un sentencia, unda e ta bisa cu e ciudadano mericano mester wordo trata mescos cu un "Rijksgenoot". Masha poco atencion a ser poni al respecto. Esaki ta di lamenta, pasobra nos a adverti pa esaki for di hopi tempo caba.

Tempo cu mi tabata responsabel pa e cartera di "Vreemdelingenzaken", mi mester a discuti fuertemente cu Hulanda y Antias, pa motibo cu nan tabata insisti pa Aruba tambe acepta e asina yama "Vrije Verkeer van Personen", y ni cuanto presion cu a ser poni, mi a sa di resisti nan tur, pasobra mi maneho tabata dirigi riba proteccion di nos yiunan di tera. Cada vez mi tabata mustra riba e "Vriendschapsverdrag" cu Hulanda tin cu Merca, cu ta vigente pa Aruba tambe. Hopi a critica mi, wel ata prueba di e proverbio den Hulandes: "een gewaarschuwd man telt voor twee"!! Manera tin un dicho famoso di awendia ta bisa: " MI A TAHA BO"!!

Despues di cambio di gobierno na 2009, mi maneho estricto na DIMAS, y mas importante SIN corupcion, na defensa di e clase trahador local, a cambia pa un maneho "FREE FOR ALL", yena cu corupcion atrobe. Consecuencia di e maneho aki ta cu nos propio yiunan di tera no ta bin na remarca pa haya un trabow na ningun nivel.
Mi mester hari ora cu mi tende ministernan bisa cu no ta duna "Eerste vergunning" mas. Esaki ta un mentira, y mi ta spera cu e titular responsabel pa esaki, hiba mi corte tambe, pa mi por cuminza na mustre un prueba. Y no ta di un "inwonende dienstbode".
Tin hopi permiso di "inwonende dienstbode" masculino, cu a y cu ta drentando mercado laboral, te hasta ta wordo bisa riba recomendacion di cierto ministernan. Si nan no ta subiendo nos mercado laboral, anto na Aruba nos mester tin hopi "butlers" trahando na cas di hende.
Banda di esaki, masha hopi hende ta haya un "toeristisch verblijf" pa 6 luna sin ningun tipo di garantia.
Ta mas cu obvio cu esnan cu e tipo di permiso aki, no ta keda Aruba pa ta turista, pero ta pa drenta e mercado laboral, y loke nan ta ser paga ta un salario hopi biaha bow sueldo minimo. E consecuencia directo ta cu alrededor di 60% di nos hendenan no ta contribui cu ni un cen preto na belasting.
Aki ta nos yiunan di tera ta esunnan cu ta sufri, paso e yiu di tera no ta dispuesto ni pa traha pa un salario miserable, ni ta dispuesto pa keda sin paga belasting. Pues nos yiunan di tera a para bira ciudadanonan di segunda categoria den e nivel di trabow abow te mediano.
Na 2009 tambe a cambia e maneho cu ta concerni "Rijksgenoten". Esaki tempo cu Mike E. y Benny S. tabata lembelansa di Hulanda, y e tempo ey nan tabata complace cu e deseo di politiconan Hulandes pa introduci e asina yama "vrije verkeer van personen". Y na varios ocasion mi a adverti pa e consecuencia cu esaki lo por tin pa nos yiunan di tera, pero atrobe niun hende kier scucha. Den e maneho aki, na unda tin un "super soepel beleid" pa loke ta concerni "Rijksgenoten", nos yiunan di tera mester bay competi riba un e mercado laboral di e nivel medio y halto tambe cu e Hulandes Europeo y e Hulandes Antiyano. Mi a mustra riba e "wet van grote getallen", na unda nos yiunan di tera un biaha mas ta den desventaha. Antes esnan cu ta bini Aruba for di e otro partinan di Reino pa traha, ta hendenan cu un nivel avansa di estudio, sinembargo awor ta den TUR ramo nan ta biniendo Aruba. Recientemente mi a mira cu mi propio wowonan con tabata tin algun Hulandes Europeo tabata verf caminda na San Nicolas. Pues aki atrobe ta nos yiunan di tera ta esnan cu lo sufri, no solamente riba e nivel abow, pero awor riba TUR nivel!!

Awor pa completa e obra, ata un sentencia a cay, pa loke mi tabata adverti p'e, cu ta perhudica nos yiunan di tera pio ainda. Awor no solamente nos yiunan di tera mester bay competi cu 17 miyon hende so di nos partnernan den Reino, pero awor cu 250 miyon hende di Merca tambe. Nos no mester perde for di bista cu gran mayoria di companianan extranhero cu ta establece na Aruba, ta mericano. No ta pornada cu nos yiunan di tera no ta haya un posicion gerencial mas. Ta un lastima di constata cu nos tin un gobierno cu ta haci tur loke ta na nan alcanse pa perhudica nos pueblo. Despues cu a endeuda nos pueblo y nos futuro generacionnan tambe door di un maneho financiero desastroso, awor mester constata cu e maneho "Free for All" di "Vreemdelingenzaken" door di gobierno lo perhudica y reduci e oportunidad pa nos yiunan di tera por contribui na e desaroyo economico di nos Pais.
Mas tristo ta cu parce cu NINGUN hende no ta mira e cosnan aki; of ta nos so ta considera e desaroyo aki negativo pa nos yiunan di tera y nos Pais??

Ta hopi remarcabel cu masha poco atencion ta wordo poni riba e asunto aki, ni di parti di AVP, ni e prensa comprometi ni esun no comprometi, y ni tampoco otro partidonan politico. Acaso e asunto aki no tin "juice" politico? Wel, nos si ta para ariba cu mester bin un paro inmediato di e maneho "free for all" y e "super soepel beleid" aki. Mester salbaguardia nos sociedad Arubano prome cu ta laat. Nos sociedad Arubano, nos yiunan di tera cu ta durante di añanan a bin biba riba e pida baranca aki procedente for di tur parti di mundo, a crea un cultura, custumbernan, te hasta nos dushi Papiamento, cu no por bay perdi djis pa un capricho politico di un paar di hendenan hambrá pa poder, cu a sa di manipula nos pueblo. Pero awor no ta momento ni pa mustra dede riba e pueblo, ni pa huzga e pueblo, pero pa siña di nos erornan. A yega e momento pa para e desaroyonan negativo aki, y nos NO por cansa sino nos ta perde.
"TA E PUEBLO SO POR SALBA E PUEBLO"!!

Expresionnan haci den e articulo aki no necesariamente ta refleha opinion di ArenaPoliti.co