Aruba a anuncia su di seis Green Conference

ORANJESTAD- E di seis Green Conference ta wordo teni na Aruba na luna di October. Prome Minister Eman a bay bek den tempo y a corda esnan presente con seis aña pasa Aruba a presenta un vision pa loke ta sostenibilidad y relaciona cu esaki futuro di Aruba. “Nos no a pensa cu e pasonan cu nos a tuma e tempo ey pa pone energia renobabel asina central riba agenda di pais Aruba, lo tabatin e impacto cu e tin awe den mundo.” Un berdad indiscutibel, mirando cu Eman y Aruba un bes mas ta riba plataforma internacional riba e tema aki. Un rato despues di e anuncio di Green Aruba, Prome Minister Eman a biaha pa New York na unda riba invitacion di Nacionnan Uni y representando Reino, e lo tene un discurso riba e temanan ‘energia renobabel y sostenibilidad’.

“Na Nacionnan Uni mi lo duna un discurso dilanti e organo mas halto di Nacionnan Uni, e ‘Security Council’ pa presenta e vision cu Reino tin pa islanan cu ta den desaroyo, islanan cu tin retonan similar en comun y e forma con por garantisa e desaroyo sostenibel di e islanan aki”. Eman ta orguyoso con Aruba a logra haya un posicion special y esaki no solamente pa e vision presenta e ultimo añanan, pero tambe pa e pasonan consistente cu gobierno di Aruba a bin ta tumando pa por logra cu na 2020 Aruba ta completamente sostenibel riba tereno di energia. Eman a recorda tambe con aña pasa, na e prome lustro di Green Aruba, e parke solar mas grandi den Caribe y sigur esun mas excepcional den region door di su diferente funcionalidadnan, a keda presenta. Su so ta produci 4% di e total di energia cu e isla mester, un percentahe halto y banda di esaki su aspecto estetico cu ta fungi como un dak pa duna sombra na e autonan para bou dje, tin camaranan di siguridad y iluminacion. “Tur esaki ta haci e parke uno excepcional”. Otro proyecto den desaroyo ta esun di ‘waste to gas’. Algo cu ainda ta den proceso y cu pronto ta wordo introduci y despues amplia. “Tur loke ta bayendo dump awor por bay pa Ecotec cu lo haci e transicion di e ‘waste’ aki den energia. Poco pais den mundo tin un facilidad asina unda por produci 7 pa 8% di nan capacidad basa riba e ‘waste’ di e pais. Adicional na esaki tin e aspecto di medio ambiente ya cu e ora practicamente por cera dump cu ta causa molester y no ta pas den e vision di un pais sostenibel”, Eman a bisa.

E Green Conference ta crece den su magnitud y impacto. “Tanto local como internacional. Awor nos tin United Nations como partner den esaki. Mescos tambe nos tin Clinton Foundation como partner, Carbon War Room, Rocky Mountains Institute y e departamento di Energy Mericano como partner. Tur esaki ta dunando indicacion cu Aruba ta bay ta conkistando mundo tanto a base di nos vision como tambe con nos ta ehecutando e vision aki pa bira un pais 100% sostenibel. Esaki a acapara atencion, respet y partnernan influyente pa crea apertura pa nos pais y otro paisnan den mundo”, Eman a remarca. 

Expresionnan haci den e articulo aki no necesariamente ta refleha opinion di ArenaPoliti.co