Diahuebs tabata un dia importante y di celebracion unda a pone arte y cultura mas accesibel pa publico general. E proyecto aki ta conta cu un colaboracion di entidadnan diversifica. Artista local conoci cu ta Osaira Muyale a traha conhuntamente cu partnernan manera Aruba Tourism Authority, Ministerio di Cultura, partner internacional cu ta Mondriaan Fund y bou di guia di Renwick Heronimo.

Ta trata aki di un proyecto cu ta conta e Historia di Paardenbaai, manera e nomber mes ta bisa. e ta un refleho di e storia di e area aki den Oranjestad unda den siglonan 16 tabata benta e cabaynan for di barco unda nan mester a landa yega tera. E fantasia di e cabay color blauw ta refleha netamente e hecho aki cu e ta sali for di awa.

E ta un obra publico cu no ta conta solamente e historia aki pero ta bay mas profundo, haciendo arte y cultura hopi mas accesibel pa publico y nos bishitantenan. E ta parti di un maneho di Ministerio di Cultura poniendo cultura riba un plataforma principal y creando un fusion cu nos turismo. Intencion ta pa e turista realisa cu unda e ta cana tin un storia. Atraves di su recorido, den di nos centro di ciudad,  e ta siña un poco mas di nos historia.

Banda di esaki e cabaynan ta bay lanta un curiosidad entre nos propio hendenan, stimulando nan pa investiga mas riba nos historia. Esaki lo crea un accion proactivo den nos comunidad pa sa mas, promoviendo nos cultura mas ainda, manera hopi ta desea. Cu esaki ta pone cultura un paso mas cerca di excelencia.

E proyecto di obra publico yama Paardenbaai, ta papia di historia di Aruba, cual ta historia di nos mes. Nos storia cu ta uno hopi rico den diferente faceta y cu e proyecto di Paardenbaai, Ministerio di Cultura ta trece un di e facetanan padilanti.

Rosalinda ta e prome cabay instala, pero den e simannan nos dilanti lo instala e otro 7 cabaynan yama Ambrioso, Bonifacia, Dosithea, Eufrosina, Sinforosa, Saturnina y Escapia. Hunto nan lo conta e storia di Paardenbaai na un audiencia extenso.

Expresionnan haci den e articulo aki no necesariamente ta refleha opinion di ArenaPoliti.co