MEP: Mientras demas partidonan ta pleita, MEP ta sigi crese
MEP orguyoso di su lider Evelyn Wever-Croes
Campaña electoral a cuminsa y por nota cu mientras demas partidonan politico ta kibra pa motibo di pleito, MEP ta sigi crese.
E crisisnan den AVP tin e liderasgo di partido hopi nervioso, desde cu votegetter # 2 di AVP y e politico cu mas tabata cresiendo den AVP, a kibra cu AVP. E kiebro di Otmar Oduber cu su 4 mil votonan lo causa un daño grandi na e partido, cu ta wordo asota pa pleito. E kiebro di Marisol Lopez-Tromp cu AVP tambe a tipifica e cantidad di pleitonan den e partido. Bo no ta mira e partido uni ningun caminda. Muestra di e desunion grandi den henter e partido. E chance ta masha chikito cu AVP lo recupera di e kiebro aki y e pleitonan aki.
E otro partido oponente ta PDR tambe ta wordo asota pa pleito interno. E kiebro den PDR tambe ta bisto na momento cu e votegetter # 2 Alonso Tromp no a sigi pasonan di lider di e partido pa subi un otro lista.
Mientras e pleitonan tin tur hende ocupa den demas partidonan, partido MEP ta sigi crese den union y den forsa. E siman aki MEP ta lansa su hala hubenil HOT bou dirigencia nobo y dinamico di sr. Lyonel Dirksz. Algo cu a anima henter e gran famia di MEP. Hobennan ta afiliando nan mes na MEP como E partido cu nan por logra un cambio pa Aruba, un partido den cual NO tin pleito, y ta reina UNION pa logra progreso y bienestar pa nos pais.
MEP ta cresiendo cu candidatonan nobo, y entre nan tin hopi interes di candidatonan di demas partidonan cu a cansa di e pleito y mal maneho den nan partidonan. Candidatonan cu a cansa di lidernan arogante cu no ta pensa riba nada otro cu nan mes.
Y tur esaki ta danki ma e liderasgo fuerte y determina di MEP. Lider di MEP Evelyn Wever-Croes a demostra di ta e unico lider politico realmente capas pa guia e pais aki. Contrario na lider di AVP cu ta debil, y lider di PDR cu ta insigur, lider di MEP Evelyn Wever-Croes ta fuerte, sincero y determina pa hiba MEP pa e victoria na september di e aña aki.
MEP ta orguyoso di su lider Evelyn Wever-Croes pasobra mientras demas partidonan ta wordo asota pa pleito, MEP ta sigi crese.
Expresionnan haci den e articulo aki no necesariamente ta refleha opinion di ArenaPoliti.co