Pa lunanan largo miembronan di MEP y PDR ta bisa cu nan tin companianan cu kier cumpra y maneha e refeneria na Aruba. Esaki tin hopi hende asombra. Pakico ta desmantela e refeneria si tin compania cu kier habri'e. E ta zona straño!

E berdad ta cu niun partido aki na Aruba kier pa e refeneria sera. Ta cua gobierno kier perde 1500 cupo di trabou? Ta cua gobierno lo kier perde 12% di e GDP di su pais? Ta cua gobierno kier perde mas cu 200 miyon florin na entrada den caha di gobierno of 450 miyon florin den divisa externo? Ta imposibel pa imagina un gobierno asina. Ta pesey Rene Herde a manda bisa tur esnan cu ta saca potret cu carta y pone den corant pa nan pura bay hiba e companianan aki pa papia cu e doñonan di e refeneria. E doño di e refeneria ta VALERO. Nan oficina ta na Texas. Ta eynan nan mester bay. Rene Herde:" Mi no por imagina mi un abogado cu no por bisa cu cliente na unda e mester ta pa cumpra e compania." Tur compania serio cu a yega di expresa nan interes pa e refeneria di Aruba a haya e conseho pa bay papia cu e doño di e refeneria VALERO na Texas na Merca. Lamentabelmente e refeneria no ta di Aruba! Aunke gobierno di Aruba a haci tur lo posibel pa haya un partner nobo pa Valero of pa haya cumpra e refeneria. Gobierno di Aruba a acompaña su mahestad Rey Alexanader pa su biahe na Brasil. Hunto cu su mahestad Reina Beatrix nan a bay Mexico pa papia riba e posibilidad pa e compania estatal di Mexico tuma e refeneria. Apart di Mexico y Brazil, a bay Venezuela y Colombia. A trece Valero y Ptrochina hunto y casi logra un acuerdo cu Petrochina. A reuni na varios ocasion cu ehecutivonan di gobierno Venezolano y PDVS pa opera of cumpra e refeneria.  A reuni cu e compania estatal di Trinidad y a ricibi companianan priva. Tur cu a mustra interes mester a bay papia cu Valero na Texas! Ta eynan ta sera e deal.

REALIDAD
E partido MEP ta purba crea e impresion cu ta gobierno di AVP no kier habri e refeneria y cu ta gobierno di Aruba kier desmantela e refeneria. E realidad ta cu ta Valero ta dicidi si e ta habri e refeneria si e haya un partner nobo serio pa oper'e of pa bend'e si e haya un cumprado pa e refeneria. Si segun Valero e no haya un compania capaz y serio pa cumpra of opera e refeneria, ta Velero ta esun cu ta dicidi di desmantela esaki. No ta gobierno di Aruba!

E realidad tambe ta cu ta bou gobernacion di e partido MEP a sera e refeneria di Lago y di Valero.  Dos biaha a sera e refeneria cu MEP den gobierno! E realidad ta cu ta AVP a negocia e reapertura di e refeneria na 2011. E realidad ta tambe cu ora mester a aproba e areglo pa e refeneria habri ta MEP a vota contra y ta e lider di MEP a sali bay su cas pa e no tin cu vota!

Si awe MEP of PDR tin companianan cu kier y por opera e refeneria, nos kier pa nan pura bay serca Valero y no perde mas tempo!!! Pura, pasobra nos kier pa bolbe crea e 1500 cuponan di trabou bon paga. Nos kier pa nos hobennan tin oportunidad pa un carera tecnico aki na Aruba mes. Nos kier e mas cu 100 miyon florin extra den circulacion di nos economia. Nos kier e 450 miyon florin cu segun Banco Central e refeneria tabata genera na divisa pa Aruba. Nos kier e mas cu 200 miyon florin na entrada den caha di gobierno. Nos si kier pa Aruba y San Nicolas florece. Pero sa cu no ta logra esey cu critica of palabra bashi. Bo tin cu traha pe manera nos ta haci!

Expresionnan haci den e articulo aki no necesariamente ta refleha opinion di ArenaPoliti.co