Parlamentario mr. Xiomara Maduro (MEP): Minister Eman kier pa Pueblo elogia tur locual ta kibra nos Pais
E ta un berguensa pa constata con nos Promer Minister Eman kier manipula e mente di nos Pueblo pa elogia tur locual ta kibra nos Pais. E mandatario kier pa nos Pueblo ta orguyoso di e MEGADEBE, e kier pa nos ta contento cu nos a perde nos autonomia financiero y ta bou supervicion financiero di CFT, e kier pa nos ta contento cu e pobresa creciente y pa nos conforma nos mes pa ta un esclabo moderno. Minister Eman kier pa Pueblo elogia tur locual ta kibra nos Pais.
Megadebe
E ta conoci cu Gabinete Eman a redobla e debe di nos Pais y crea un MEGADEBE. Minister Eman te ainda no por splica Pueblo na unda e placa aki a bay. Tur rapport di Banco Central y CFT ta bisa cu menos di 1% di tur e placa aki a bay na inversion pa Pueblo. Ya cu Minister Eman no por saca su som, e mandatario a cuminsa un campania di manipulacion bisando cu Pueblo mester ta orguyoso di e debe. Imaginabo net un debe cu ta pone cu Pueblo su cartera tardi of tempran ta bay wordo kibra cu belasting, nos Prome Minister kier pa nos ta contento cune y hasta elogia esaki.
Supervicion financiero
E siman aki mes Minister Eman a sali papia riba e ultimo rapport di CFT riba e cifranan di 2015 y kier pa Pueblo ta contento cu Gabinete Eman a logra cumpli cu e norma hinca den e Ley di supervicion financiero CAFT. Sinembargo a logra cumpli como cu den luna di december 2015 a CASTIGA e Pueblo cobrando belasting ferozmente y a pluma e comerciantenan pa nan paga belasting adelanta. Pues Minister Eman kier pa Pueblo ta orguyoso y contento di a wordo CASTIGA. Ta con Minister Eman kier pa Pueblo ta contento si e ta wordo CASTIGA? Con Minister Eman kier pa nos ta contento cu nos Pais cu tin un Status Aparte ta bou di curatela di supervicion financiero di CFT y Hulanda?
Pobresa y esclabitud moderno
Minister Eman kier gaba cu tur e toeslagen cu Gabinete Eman ta duna. Pero e mandatario no ta bisa cu su maneho ta locual a trece un cantidad di hende den pobresa. Hisa prijs di awa y coriente. Laga tur hende drenta y keda Aruba pa 180 dia pa traha ilegalmente, keda sin crea cupo di trabou, proteha dunador di trabou cu ta abusa di empleado, permiti cheap labor y haci schoolnan inpagabel etc etc. Minister Eman su maneho ta hiba Pueblo den esclabitud moderno anto ainda e kier pa Pueblo ta contento y elogia esaki?.
Uni enves di kibra nos Pais
Nos ta lamenta y condena e manera cu Minister Eman ta kibrando nos Pais cu tanto mentira y manipulacion. Awor hasta ta bay den e extremo di manipula e Pueblo pa nan ta contento y elogia hustamente locual ta haci nan danio. Un Pueblo uni ta bay dilanti, pesey no permiti Minister Eman pa sigi kibra nos Pais cu su mentira y maipulacion. No cay den e trampa di Minister Eman pa elogia locual ta kibra nos Pais.
10 maart 2016
Expresionnan haci den e articulo aki no necesariamente ta refleha opinion di ArenaPoliti.co