Parlamento no a of ta bay instala niun comision di parlamento mes. Si ta bay controla. 

Durante di tratamento di presupuesto 2015 parlamento a adopta dos mocion den cua ta pidi gobierno pa instala un comision of team di experto pa averigua un biaha mas si por habri y opera e refineria na San Nicolas. Den tur dos mocion - uno di PDR y uno di AVP- ta pidi gobierno pa haci e trabou di laga expertonan wak un biaha mas bon si tin e oportunidad pa e re-apertura. Den un mocion di partido MEP cu a wordo rechasa door di parlamento, tambe ta pidi gobierno pa laga haci e envestigacion aki y presenta un plan na parlamento. Rene Herde': "Den niun di e mocionnan y den niun reunion y na niun momento, niun partido den parlamento a pidi pa parlamento mes lanta un comision pa haci e envestigacion di posibel reapertura." Rene Herde di AVP a declara esaki den e reuda di prensa di fraccion di AVP diamars mainta. Cu esaki y cu preuba di e mocionnan ela contradeci completamente e storia di e lider di MEP cu a bisa cu ta parlamento ta bay lanta comision y cu ta bay haci trabou cu gobierno no por haci. Un biaha mas a gara e lider di MEP ta gaña!

ROL DI PARLAMENTO
Rene Herde' a sigui splica cu e rol di parlamento no mester ta pa haci envestigacionnan asina. E no ta tarea di parlamento y parlamento no tin e instrumentonan pa haci esey. Gobierno si tin e tarea di ehecuta loke parlamento encargu'e pa haci y gobierno tin hopi mas instrumento pa haci tareanan asina. Si ta e rol di parlamento pa bisa cu kico e envestigacion mester cumpli y den cuanto tempo e mester ta cla. Den e dos mocionnan cu a wordo entrega esaki ta wordo haci tambe. Den e mocion di PDR ta pidi gobierno pa haci e envestigacion den dos luna. Den e mocion di AVP a hasta duna gobierno mas tempo. Cu esey e fraccion di AVP ta enfatisa cu e ta duna gobierno suficiente tempo pa busca extensamente tur posibilidad pa re-apertura di e refineria. Pero na mes un momento AVP a bisa gobierno pa sigui busca alternativanan pa desaroyo economico, pa crea cupo di trabao y pa un desaroyo nobo pa San Nicolas, en caso cu e reapertura no logra. Cu otro palabra e fraccion di AVP ta tene tur opcion habri pa sigui desaroyo di San Nicolas.

MOTIBONAN PA RE-APERTURA
E mes un argumentonan cu a usa cuatro aña pasa pa habri e refineria despues cu MEP a sera e refineria, ta loke a usa awor atrobe. Cuatro aña pasa e partido MEP a rechasa e argumentonan cu awe nan mes ta usa, comosifuera ta argumentonan nobo. Cuatro aña pasa ta e partido MEP a rechasa e reapertura y a vota contra di e acuerdo pa e habri e refineria. Awe MEP a bolter atrobe y kier crea e impresion di kier habri e refineria. E realidad den mundo di petrolio ta cu awe e condicionnan ta mas malo cu nunca antes. E canal di television CNN a caba di presenta un envestigacion di con malo e desaroyo den mercado di refinamento di petrolio ta y cuanto refineria a sera. Sinembargo e fraccion di AVP no kier exclui niun posibilidad pa e re-apertura di e refineria cu lo nifica mas entrada y trabou pa nos isla. Pero pa AVP e re-apertura no tin mag di ta un aventura pa un of dos aña cu hende cu kier djis gana placa lihe y core bay. E mester ta un plan serio pa hopi aña y cu partnernan serio y cu experiencia den rafina pertolio. Rene Herde': "Nos no por laga niun hende haci mal uso cu nos pais of dal nos un cara abou. E mester ta algo stabiel y sigur pa hopi aña. Si no, nos mester sigui cu un desaroyo completamente nobo."

Expresionnan haci den e articulo aki no necesariamente ta refleha opinion di ArenaPoliti.co