ORANJESTAD –  E titular di Infrastructura pa Gabinete Mike Eman I y II, Minister Benny Sevinger a anuncia dialuna mainta e secuencia di e trabounan cu ta tumando luga y ta bay continua pa resto di e aña rond di centro di ciudad. Despues cu Caya Grandi a keda cla y mientras cu ta trahando riba Welcome Plaza na waf, tin e cayanan paralelo na caya grandi cu tambe ta haya un mehoracion y embeyecemento na beneficio di tur usuario, cu ta pueblo y bishitantenan di Aruba.

Actualmente Departamento di Obranan Publico ta traha riba construccion di e prome fase di Welcome Plaza. Esaki ta e area cu ta bay yama nos turistanan di crucero bon bini y for di unda por aborda un tram pa bishita henter centro di ciudad. E trabounan aki ta inclui tambe Schelpstraat cu ta e caya cu ta pasa dilanti di Museo Arkeologico patras di Kong Hing Supermarket.

Na mesun momento DOW tambe ta finalisando e di dos caya banda panort di Caya Grandi. Despues di a keda cla cu Hendrikstraat, awo ta cabando cu Waterweg patras di Dufry y Aruba Bank. Su tras ta bin di biaha Middenweg cu ta pasa patras di CMB y ta yega te na Dwarstraat banda di Burger King. Asina cu  caba ey, ta cuminsa cu e cayanan pazuid di Caya G.F. Betico Croes.

“Ta cuminsa for di Niki Habibe bin abou,” Sevinger a indica. “En conexion cu e construccion di Zara ta laga por ultimo Klipstraat pa DOW no stroba e trabounan, pero trabou ta siguiendo.”

Minister Sevinger ta kere cu ta importante pa nos centro di pais ta esun cu ta e prome cara pa nos turistanan. Esaki ta un punto cu FCCA, e asociacion internacional di crucero ta di acuerdo cune. “Tur e renobacion aki ta trece desaroyo economico, ta trece mas empleo pa nos hendenan y na final nos tur como pais ta bay dilanti,” Minister a bisa.

El a finalisa felicitando Prome Minister pa su vision y dedicacion na realisacion di e vision, como tambe Stanley de Marchena kende ta bay lidera e esfuersonan di BID y tur esnan envolvi den e actividad di fin di siman aki.

Expresionnan haci den e articulo aki no necesariamente ta refleha opinion di ArenaPoliti.co