Entrante awe pago pa parkeer ta bin na vigor!

Despues di aprobacion di e ley di CAFT door di e 13 traidornan di AVP, indudablemente un gran cantidad di medida ta na caminda e momento aki pa sigui suta pueblo sin misericordia. Ultimamente partido MEP a elabora riba 6 di e 24 medidanan cruel cu ya ta cla pa ser ehecuta den e dia y simannan venidero. Siguientemente MEP ta trece mas di e 24 medidanan padilanti y cual suma di e medidanan ta ser describi den e tabel adhunto.

Reduccion contribucion AZV: Gabinete Eman cueste loke cueste kier kita su responsabilidad financiero for di AZV y den cuadro di esaki nan a bin ta reduciendo e contribucion di gobierno na e fondo aki drasticamente. Pa logra implementa e medida aki  nan a aumenta e prima di AZV cu 1% na januari 2011, un otro aumento cu 1% na December 2014 (Health Tax) y anticipando aprobacion di e ley di CAFT nan a bolbe aumenta e BBO cu 1% na juli ultimo y pa berguensa politico a yama esaki BAZV. Sinembargo tin tur indicacion cu e medidanan aki no ta keda te ey, ya cu nan tin intencion serio tambe di introduci contribucion propio pa bishita na Eerste Hulp, pa Huisartsenpost y contribucion propio pa cada receta boticario.



Reduccion subsidio FFD: Gabinete Eman lo corta tambe den subsidio di e Fundacion di Facilidadnan Deportivo (FFD). Cu e medida aki e fundacion – cual su meta primordial ta pa mantene e cancha y facilidadnan deportivo – lo no tin fondo suficiente mas pa por mantene tur e facilidadnan aki. Durante Gabinete Oduber (2001-2009) un sin fin di facilidadnan deportivo a ser construi y pa percura pa un mantencion optimal gobierno di MEP a institui e fundacion FFD aki. Remarcabel ta cu durante e ultimo 6 añanan di Gabinete Eman ningun pero ningun cancha ni facilidad deportivo nobo a ser construi, pero awor si gobierno ta cla pa laga tur e facilidadnan deportivo existente bay den un estado di deterioro door di corta den subsidio di FFD.

Restructuracion Arubus: Despues cu Gabinete Eman a hinca Arubus den problema financiero cu tur e gastonan (sin ningun entrada!) di e Tramnan lantando e compania Arutram, awor gobierno kier sigui corta den subsidio di Arubus y pa logra esaki nan a lanta e compania di familia y compinchi, esta Aruparking. Entrante awe e centro di ciudad lo conoce e medida di parkeermeters y cual medida lo afecta principalmente e gran mayoria di personanan cu ta traha den Oranjestad y cu ta gana un salario minimo, ya cu nan tin cu paga 75 florin tur luna (900 florin pa aña) pa parkeer nan auto. Alavez e habitantenan cu tin nan cas den e centro aki lo mester bay paga pa parkeer nan auto dilanti nan propio cas. Mester remarca si cu desde cu gobierno di MEP a funda Arubus na 1979, MEP a percura pa e compania aki tur aña haya su subsidio 100% ya cu MEP como un partido social democrata semper a sali na vanguardia di esnan di menos recurso cu no ta dispone di nan propio medio di transportacion.

Crea fondo propio pa institucionnan subsidia: Hopi ta e fundacionnan na Aruba, manera SABA, SVGA, Casa Cuna, FMAA, FDEC cu ya desde 2014 caba a ser corta drasticamente den nan subsidio. Esaki a pone cu varios di e fundacionnan aki ta luchando pa sobrevivi e castigo aki impone riba nan lomba door di Gabinete Eman. Sinembargo pa e gobierno aki esaki no ta basta y durante 2015-2018 tur nos grandinan, nos hendenan special, nos muchanan huerfano, personanan cu adiccion lo sigui wordo afecta door di e medida di cortamento di subsidio aki. Awor Gabinete Eman kier pa e institucionnan bay busca fondo pa nan mes y esaki door di bende rifa, cuminda, carwash etc. y p’asina gobierno no tin nodo di hinca mas subsidio den e fundacionnan. Consecuentemente gobierno ta keda cu mas placa pa nan sigui malgasta. Ta un gobierno burdugo so por trata e grupo di personanan vulnerabel di e forma aki.    (E ta sigui)

Expresionnan haci den e articulo aki no necesariamente ta refleha opinion di ArenaPoliti.co