Parlamentario Jeffrey Kelly tabata presente na e reunion di ATA pa haya un bista riba e Corporate & Business plan 2016 y tambe a atende e Cruise Symposium Aruba 2015. Sr. Kelly a keda sumamente asombra pa mira e profesionalismo cu a ser demostra pa tur esnan cu ta traha den e ramo aki. E sinergia cu tin entre diferente departamentonan manera ATA, APA, Free Zone, Departamento di Cultura y Ministerio di Turismo ta uno sumamente importante pa continua y mantene e exito cu nos pilar economico principal ta gosando di dje.

Reunion di Corporate & Business Plan 2016

Durante e reunion aki ATA a duna un presentacion di e cifranan di turismo. Entre otro por a compara cifranan di añanan anterior, aña actual y e proyeccionnan cu tin pa añanan cu ta bin. Loke tabata interesante pa mira ta cu na aña 2014 Aruba tabatin un cantidad di 1.072082 turistanan “stayover”. E aña aki te cu Augustus nos tin un cantidad di 789.875 turistanan “stayover” locual ta nifica cu pa final di 2015 por yega na surpasa e cantidad di 2014, mirando cu awo nos a drenta “high season”

Cruise Symposium Aruba

Durante e symposium a splica diferente situacionnan di e mercado di Turismo Crusero y tambe a presenta cifra y datonan cu tin di ber cu Turismo Crusero na Aruba. Por a mira cu Aruba ta score hopi halto pa loke ta trata prijs, cordialidad, tours y amabilidad di “taxi drivers” locual ta di admira. Naturalmente mester percura pa mantene esaki, keda critico y semper sondea si tin espacio pa mehoracion. A splica un tin un “taskforce” cu tin como meta pa mantene actividadnan crusero positivo. E “taskforce” aki ta reuni y brainstorm con pa mehora y hasi Aruba mas atractivo pa Turismo Crusero.

Loke a resalta ta cu ti hopi instancia y departamentonan cu ta traha duro pa mantene y mehora nos turismo en general. Ta obvio cu mester enfoca riba e cosnan positivo y e bon trabou di esnan cu ta ‘tras di cortina” y ta hasiendo nan esfuerso maximo pa mantene, promove y optimalisa nos pilar economico principal.

Duna Aruba e miho di bo

Ta lastima cu di otro banda tin opositornan politico ta hasi wega y hunga politica cu nos pilar economico principal. Constantemente por tuma nota cu ta hunga cu cifranan y ta duna un impresion eroneo y crea un scenario basa riba mal informacion.                                                                                               
Parlamentario Kelly ta di opinion cu esaki ta un falta di respet pa tur e profesionalnan cu ta traha duro pa mantene nos turismo y cu ta duna e miho di nan conocemento pa purba mehora den tur aspecto.            

Mester mantene un wowo skerpi riba e desaroyonan di nos turismo y por hasi esaki dor di bin cu sugerencianan con pa yuda mehora nos turismo na luga di sinta critica y grita constantemente cu nos turismo no ta bayendo bon a base di interpretacionnan robes. Duna un aporte positivo y optimista!
Opositornan politico ta crea e impresion cu ta concentra puramente riba cosnan cu no ta bai bon y ta tuma un postura hopi negativo y pesimista. Tur esaki djis pa saca probecho politico. Ta increibel cu desesperacion ta pone hende bai asina leu di bai hunga cu nos pilar economico principal. Den e caso aki Parlamentario Kelly ta pone enfasis riba e lema nobo cu ATA a presenta cu ta bisa “Duna Aruba e miho di bo!”

Expresionnan haci den e articulo aki no necesariamente ta refleha opinion di ArenaPoliti.co