Ta ora companianan ta haci ganashi, nan por crea trabou, paga e trahadornan mas y duna mas beneficio. Pa logra esaki ta stimula companianan pa produci mas, ta yuda nan ta productivo y gana placa. Pa crea e miho condicionnan ta sinta na mesa den dialogo y propone leynan nobo y cambio den leynan existente. Ta asina a logra lanta economia bek for di e buraco cu e tabata na 2009; asina a crea mas cupo di trabou, salba e fondonan di pensioen, crea e seguro di pensioen pa trahadornan den sector priva. Ta asina a crea condicionnan mas favorabel pa trahadonan femenino y pa mamanan por haya nan jiu sin perde trabao of entrada. Ta asina a crea seguronan social di cesantia, cuido medico y pensioen. Ta asina por y sigura adelanto social den futuro tambe. Nos mester percura pa e 15 mil companianan cu tin na Aruba, ta mas rendabel y cu nan ta crea mas trabou, sea cu ta un hotel of un compania di construccion, un oficina of un restaurant. Pasobra ta companianan cu ta produci y haci ganashi ta contribui. Un compania cu no ta haci ganashi of cu ta bay bancarota, no ta crea trabou y no ta contribui na seguridad of na fondonan social.

CONSTRUCCION
Un di e sectornan cu ta produci hopi ta e sector di   construccion y di infrastructura. Mescos cu e sector di hotel e sector aki ta rekeri hopi trahado. E salarionan den e sector di construccion ta mas halto cu den otro sectornan. Pero pa motibo di cu e sector ta depende di proyectonan cu ta caba na cierto momento, e doñonan di trabou den e sector di construccion ta indica cu nan mester traha cu trahadornan temporal pa duracion di e proyectonan. Esaki obviamente ta un situacion dificil pa trahadornan. Nan tambe kier tin e seguridad di trabou y entrada henter aña. Rene Herde': "Den combersacion di FTA nos a indica cu den e dialogo cu doñonan di trabou y sindicatonan den e sector aki, mester atende cu e problema aki. Mester busca un forma legal pa e companianan tin e trahadornan cu nan tin mester ora tin proyectonan. Na mes un momento mester busca un solucion cu ta duna e trahadornan e maximo seguridad pa trabou y entrada henter aña."

CONSECUENCIA INDESEA
E consecuencia di no tin un solucion specifico pa e sector aki ta cu bo ta keda cu e consecuencianan di "cheap labor" cu ta salarionan mas abou, competencia inhusto pa nos trahadornan; mas trahado di exterior pasobra no ta atractivo pa traha den sector di construccion y sub-contratistanan cu e unico cos cu nan ta haci ta huur trahado na e contratistanan grandi y gana placa di e trahadornan. Seguridad di trahadornan y e beneficionan social di nos pais ta sumamente importante. Pero ta solamente door di sigura cu nos companianan ta funciona bon y ta productivo y door di dialogo, por soluciona e necesidadnan specifico di e sector aki y sigura entrada y beneficio pa tur trahado, segun Rene Herde'.

Expresionnan haci den e articulo aki no necesariamente ta refleha opinion di ArenaPoliti.co