Ora lesa e ley di initiativa di parlamentario Chris Dammers no por jega na otro conclusion cu sinberguenseria a jega su top! Cu e initiativa Chris Dammers y su coleganan di AVP kier a tira un atraco ariba caha di pueblo jenando nan saco cu beneficionan cu pa regla nan no tin derecho ariba dje! Chris ta parlamentario bo ta y no ambtenaar! Con bo kier pidi pa cambia e ‘ley di versobering’ cu fraccion di AVP y 2 bulado di cura (14 voto) a pasa na 2010 y exigi pa wordo trata como y ricibi tur beneficio cu ambtenaarnan tin.

Falta pa boso a pidi pa LMA ta aplicabel tambe pa boso y e bonus di pasco! Den un forma hopi astuto (pero bobo alabes) Chris kier a drecha e asunto di seguro medico pa Parlamentarionan cu no a tene cuenta cune den e ley di Versobering na 2010 pa saca probecho financiero personal! Cu ki cara Chris Dammers por wak pueblo den su cara y bisa pueblo cu e tambe kier cobra bashi premie mescos cu e ambtenaar pasobra e 150.000,00 florin cu e ta gana no ta jega! Chris, Baba, Sneek, Melvin y tur su coleganan di fraccion di Avp mester tin un mentalidad di probechado so pa por pensa di pidi bashi premie y gelijkbedrag! Of kizas e mentalidad di nos tin 13 y ta nos ta manda combina cu arrogancia a pone Chris pensa cu tur cos ta posibel!

E ley di Chris Dammers mester wordo hala aden y tira den prullenbak! Hopi curashi Chris Dammers mester tin pa manda su ley pa Raad van Advies pa conseho mientras e meta primordial di su ley tabata pa saca probecho personal. Fraccion di MEP pa medio di colega Glenbert Croes a vota contra e ley di Chris Dammers! Chris no a gusta y jama partido MEP pa falso! Partido MEP por duna Chris Dammers y su coleganan full un encyclopedia di falsedad pa loke ta trata historia politico di su partido AVP. Falsedad ta ora cu Chris por pensa di usa partido MEP pa vota pa su fechorianan! 

Ley di initiativa ta un derecho di parlamentarionan pa bin cu ley nobo of hasi cambio den leynan existi semper y cuando na bienestar di pueblo! No pa probecho personal! E ley di Chris Dammers definitivamente no tin nada di hasi cu ‘versobering’! 

Parti di e ley y su splicacion di Chris Dammers den cual Chris ta pidi Bashi premie y gelijkbedrag pe y su coleganan di Avp … 

Expresionnan haci den e articulo aki no necesariamente ta refleha opinion di ArenaPoliti.co