Gabinete ME II: Prome Minister Mike Eman a tuma despedida di Consul Honorario di India
Ayera mainta, Prome Minister Mike Eman a ricibi na su oficina na Bestuurskantoor, e bishita grato di Consul Honorario di India, na Aruba, Ramchand Doulatram Boolchand Nandwani. Lamentablemente, e ocasion e biaha aki tabata pa e diplomatico tuma su despedida. E encuentro a bay den un ambiente masha ameno y sincero, manera Sr. Boolchand mes a comenta na su salida. E ta bay cu e satisfaccion di laga e lasonan entre e comunidad Arubiano y Indio den hopi bon estado y cu un perspectiva prometedor pa futuro. Tambe, e Consul Honorario a elogia e pasion y dedicacion di Prome Minister Mike Eman su gestion pa cu pais Aruba.
Sr. Boolchand a fungi como Consul Honorario di India pa Aruba, cu sede na Willemstad, Corsou for di aña 1999. Recientemente el a wordo informa dor di Embahador di India na Venezuela, cu e ta wordo reemplasa pa otro Consul Honorario cual su nombracion no ta confirma ainda. Mientras tanto, Consul Boolchand a cuminsa yama ayo na e dirigentenan di cada pais y comunidad Indio cu e tabata representa.
Minister President Mike Eman y Consul Boolchand tabatin, den nan ultimo encuentro oficial, un intercambio di idea cu e diplomatico a cualifica manera hopi productivo pa ambos pais. “Tabatin discusionnan hopi positivo, cu mi ta spera, lo ta di gran ayudo pa Aruba,” asina e diplomatico a comenta. El a menciona e cantidad di recurso humano cu India tin den e sector di tecnologia.
Pa loke ta trata e relacion entre e comunidad Indio y e pueblo di Aruba, Sr. Boolchand ta masha contento di por bisa cu esaki “ta un relacion hopi bon y caluroso cu solamente por mehora.” Tambe e ta bay cu un impresion masha positivo di nos prome mandatario, kende el a describi bisando: “Naturalmente e ta un politico, dirigiendo un Gobierno, pero mi por bisa cu e ta un persona hopi amabel, caluroso y inteligente cu tin Aruba na curason. E ta bay mas leu cu politica, y esey ta hopi importante.”
Expresionnan haci den e articulo aki no necesariamente ta refleha opinion di ArenaPoliti.co