ORANJESTAD: "Cu asombro fraccion di MEP a tuma nota di e comentarionan di lider di fraccion di AVP den Parlamento, sr. "Baba" Herde, caminda e ta cuestiona con lo por paga salario di miembronan di fraccion di MEP, pasobra entre otro e fraccion a vota contra e presupuesto di Parlamento.

Ta obvio cu señor Herde tin un memoria hopi cortico y e a lubida caba cu ta partido AVP mes a entrega Aruba su finanzas den man CFT. Si e dia di mañan e salario di Parlamentarionan, incluyendo di dje mes no wordo paga, ta su culpa y no di fraccion di MEP. Si mañan CFT mester recomenda na corta den e presupuesto di Staten y perhudica e funcionamente di nos Parlamento, no wak MEP sino AVP mes! No ta MEP a malgasta plaka di Pueblo, ta AVP! No ta MEP a faya cu proyectonan manera esun di hospital sin un kamber di operacion, ta AVP! No ta partido MEP a duna un proyecto di Tram preferencia riba e construccion di MAVO/HAVO na Noord. Pues prome cu punta dede riba otro, señor Herde mester percura pa su cura ta limpi prome! 

Fraccion di MEP ta traha cu alma y cuerpo pa defende e interesnan di Pueblo. Esaki ta ensera no solamente e trabou den Parlamento, pero tambe trabou investigativo riba field, pa analisa y desenmascara e desaster cu partido AVP ta haciendo. Tambe cana den Pueblo, skucha nan preocupacion y convivi cu nan, ta un prioridad importante di nos fraccion. 

Ademas di su comentario absurdo, sr. Herde tin e pudor di cuestiona nos presencia den Staten. Fraccion di MEP ta puntra su mes ta ki dia Presidente di Parlamento ta laga investiga kico tur a sosode riba dia 27 di Augustus 2015. Tiro a cay den porta di Parlamento, esaki no ta wega! Enbez di ta preocupa cu e seguridad di Staten of e funcionamento cuestionabel di su propio fraccion, caminda nan a para degrada na nivel di un grupo di aplauso y coro pa grita "Voor", sr. Herde ta sinta preocupa su mes cu e funcionamento di fraccion di MEP. Un biaha mas sr. "Baba" ta demostra su mentalidad manipulador y su hamber  personal di poder" Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co