Loke a yama "irrealistico" a resulta exactamente manera a planea! 

"Ora a presenta e presupuesto 2015 organonan di conseho a yama e presupuesto irrealistico. Ora a trata e presupuesto 2015 den reunion publico ela wordo yama irrealistico y un lista di medida contra pueblo. Awor na fin di aña 2015, Parlamento ta haci su trabou di controla si gobierno a ehecuta e presupuesto manera palabra. Parlamento a haya conseho y analisis di ehecucion di e presupuesto di tur e mes un organonan di conseho. Nos a conclui -entre otro a base di e consehonan y di nos propio analysis- cu gobierno a tene su mes na e presupuesto manera ela haya aprobacion pe." Asina Rene Herde, lider di e fraccion di AVP a bisa despues di e reunion publico siman pasa pa trata e presupuesto supletorio di gobierno pa 2015.

NORMA DI PRESUPUESTO
For di algun aña caba gobierno y Parlamento ta usa normanan specifico pa evalua e maneho financiero y e ehecucion di e presupuesto. Un di e normanan principal cu ta usa tur rond di mundo y aki na Aruba tambe, ta e norma di deficit riba presupuesto. Esaki ta e suma cu falta pa sera e presupuesto. Pa e aña 2015 e presupuesto mester a sera cu un deficit di no mas cu 3.7%. Esaki ta loke a fiha den e presupuesto na comienso. Awor na fin di aña, Parlamento a controla e ehecucion di e presupuesto y a constata cu e nivel di e dificit na fin di aña ta manera a propone na comienso: 3.7%. Rene Herde lider di fraccion di AVP a bisa cu esaki ta mustra cu e maneho tabata corecto y e presupuesto tabata realistico. "Nos ta contento cu gobierno a logra cumpli cu e norma cu a wordo fiha na comienso. A bisa na comienso cu e lo ta 3.7% y na fin nos ta constata cu e ta 3.7%. E ta 'on the dot'. Esey ta bon pa confiansa den gobierno y e ta bon pa e maneho di reforma di finansa publico. E caminda pa yega e punto di Presupuesto Balansa pa prome biaha den historia di nos pais, ta yega mas serca cu e maneho responsabel y balansa aki cu nos den Parlamento ta sostene."

Expresionnan haci den e articulo aki no necesariamente ta refleha opinion di ArenaPoliti.co