Durante e rueda di prensa di Partido Democracia Real, Andin Bikker lider di fraccion a bisa cu, saludando e minister Benny Sevinger pa su cumpleaños e tin un remarca pa haci.
E ta corda con Sevinger den oposicion tabata critica pa loco e minister di infrastructura anterior pero awor a para bira cu tur esnan cerca di dje ta haya tur loke nan ta pidi e.
Andin Bikker a tuma nota di un cas na Malmok cu a wordo cumpra y cu el a duna permiso bao capa cu e ta bay wordo amplia, pa e bira un hotel.  Aki tin gañamento riba papel cu ta borderline di cosnan cu ta contra ley, el a bisa. Bo no por aplica pa X pero eigenlijk bo idea ta pa E pasobra bo ta bezig ganando y manipulando esnan cu mester evalua e vergunning aki.
Bikker a splica tambe cu riba e caso aki tin un caso den Corte pero apesar di esey minister Sevinger apenas Januari a drenta a dicidi pa cambia e destino di e erfpacht aki.
Bikker a sigui bisa cu apesar cu tin e ley di ordenanza teritorial cu ta regula e construccionnan cu mag tuma lugar den cierto areanan, e minister aki ta bay contra e propio ley aki cu ta mara gobierno y ta gewoon cambia destinacion.
Segun Bikker tin un locket unda bo por bay pidi loke bo kier y bo ta haye pero depende di con cerca bo ta di minister Sevinger, y e ta puntra su mes con por ta cu den oposicion el a cuestiona e minister anterior y mesora a drenta den gobernacion a hasta laga un compania haci un investigacion pasobra p’e e maneho di infrastructura no tabata cuadra.
Bikker a bisa cu segun’e nos tin un problema bastante serio den pais Aruba pasobra aki rato cualkier cos por tuma lugar pasobra bo no sa si mañan bo ta bende bo cas y esun cu cumpre pasa un rato cerca sr. Sevinger y e ta cambie pa cualkier otro destinacion pasobra esun di erfpacht no ta conta mas. E locket ey mester worde cera y minister tin cu respeta e leynan vigente entre otro e ROP cu ta regarda e ordenanza teritorial. El a trece dilanti un bez mas cu ora pueblo ta haya un herencia y e kier traha algo riba dje gobierno ta bisa cu no, cu e ley di ROP ta destina pa areanan berde y no por haci nada cune. Y si un hende humilde kier cambia e destinacion di su tereno erfpacht gobierno no ta permitie. E minister tin cu bin duna un splicacion con cierto personanan ta haya loke nan pidi y otronan no, kiermen ley pa un ley pa tur!

Expresionnan haci den e articulo aki no necesariamente ta refleha opinion di ArenaPoliti.co