En bes cu a presenta amienda pa duna p.e. enseñansa y husticia mas placa 

Minister Otmar Oduber dialuna atardi durante contesta di e di dos ronde di pregunta, a duna respuesta detaya riba e diferente pregunta cu a concentra mas tanto riba e parti di Aruparking y Arubus.
Mirando cu lider di oposicion tabata kier mas informacion riba e posicion di Minister Otmar Oduber pa loke ta trata su posicion pa cu Gabinete Mike Eman II, e mandatario a bisa cu como hurista lo tabata na su lugar pa e concientiza y educa nos pueblo en bes di purba tuma bentahanan politico.
Mirando cu Sra. Wever-Croes a pidi pa wak unda den presupuesto por mira e cambionan riba e puntonan di atencion presenta pa Minister Oduber, e minister a indica cu ta logico cu den un presupuesto no por haya skirbi un disputa of un diferencia di opinion cu lo por existi den un Gabinete. Den e presupuesto tin maneho fiha for di aña pasa y su posicion pa loke ta Gabinete Mike Eman II el a splike ampliamente den primera tanda, pero por ta e no ta e contesta cu esnan di oposicion lo a desea di scucha.
Entre otro Minister Oduber a splica cu criminalidad ta un punto cu tin su atencion cu e tabata hopi preocupa y ta sigui preocupa riba dje. E ta convenci cu su colega di Husticia tambe ta preocupa y tambe kier mas atencion pe y esaki ta net contrario na loke MEP cada biaha ta purba haci cu trocemento di berdad. Mescos cu ora nan a bisa cu na salida di Gobernador el lo a critica su colega di Enseñansa. Loke Minister Otmar Oduber a bisa na salida di Gobernador ta cu nan tur como colega mester por duna e atencion, e sosten na e Minister di Enseñansa y Minister di Husticia den e trabou cu nan tin cu haci.
Minister Oduber lo a spera cu en bes di haci politikeria durante tratamento di presupuesto, lo a bin cu un amienda di fraccion di MEP cu lo a bisa cu nan tambe ta preocupa y lo kier hala placa aki paya y duna husticia y enseñansa placa. A spera tambe cu en bes di haci politikeria y en bes di bully hende lo a bin cu propuestanan positivo na bienestar di nos comunidad, pero lamentablemente esey no tabata e caso y e reunion a wordo geschors te diamars mainta mirando cu un miembro di oposicion a cuminsa lanta voz y haci desordo den Parlamento, dunado asina un biaha mas un mal ehempel pa pueblo.

Expresionnan haci den e articulo aki no necesariamente ta refleha opinion di ArenaPoliti.co