Den e famoso ‘Settlement Agreement’ y e Landsverordening (ley) cu a legalisa e areglo aki ta poni: ‘Indien de raffinage-activiteiten worden beëindigd en de opslag- en overslagactiviteiten worden voortgezet, zal het erfpachtsrecht met betrekking tot de erfpachtspercelen, die niet benodigd zijn voor de raffinage-activiteiten, UITERAARD MOETEN WORDEN BEËINDIGD’. Tambe tin para ’..de installaties behorende tot de raffinaderij..dat het Land bij voortijdige beëindiging van het erfpachtsrecht, GEEN VERGOEDING AAN VALERO VERSCHULDIGD ZAL ZIJN’. Pues esaki kiermen cu gobierno lo por haya a terenonan bek di Valero despues di 3 aña cu e operacion di refinacion a para. Mientrastanto mas cu 3 añanan a pasa y si kiermen cu defacto gobierno (pues pueblo) ya ta doño di e terenonan y e instalacionnan.

Diasabra 13 februari 2016, Reuters a publica: ‘The Aruba refinery’s FORMER operator, Valero Energy Corp., has not been involved in the negotiations, but the island has GUARANTEED the U.S. company that it can walk away from the refinery with ZERO environmental liability and without OBLIGATION to dismantle’.

Locual a wordo publica pa Reuters, ta bisa cu gobierno lo a exonera Valero di tur locual a wordo palabra den e ‘Settlement Agreement’ y e ley. Dus atrobe, segun e articulo aki, gobierno a bolbe kibra un ley, sin consulta cu parlamento di antemano. Gobierno lo legalisa e infraccion aki despues, pasobra nan tin un mayoria den parlamento y bou di e pretexto cu e reapertura di e refineria ta di vital importancia pa ‘salba’ e economia di Aruba. Banda di esaki, locual a wordo negocia caba den e ‘Settlement Agreement’, ta ‘BINDING’. Dus, dicon esaki no ta conta mas? Pa pueblo compronde un tiki miho di cua sumanan nos ta papiando aki: ‘e lo costa entre 300 pa 400 miyon dollar pa desarma e refineria’ (declaracion di e minister di Energia, 24ora.com). No lubida cu e regalonan extra aki, ta bini riba e 76 miyon di florin cu gobierno a regala Valero caba den pasado, manera palabra den e mesun ‘Settlement Agreement’.

E pregunta persistente ta keda, dicon Valero semper ta haya un ‘VIP treatment’ di gobierno, mientras pueblo ta haya solamente mentira, manipulacion y medida? Si e no tabata pa biaha rond mundo manera ‘salesman’ of vocero di e Valero, e tabata pa duna Valero tur sorto di privilegio.

Biniendo bek riba e impuesto ‘salbabida’ 10 miyon dollar (18 miyon florin) cu CITGO lo paga cada aña. Esaki tambe ta un regalo di gobierno pa CITGO. Den e ley ta para: ‘Valero..jaarlijks aan het Land een minimum bedrag groot Afl. 18,000,000..Indien Valero, direct, danwel indirect haar belangen in de raffinaderij verkoopt, zal dit bedrag voor haar OPVOLGENDE EXPLOITANT ZELFS AFL. 27,000,000’. Pues gobierno ta cuminsa regala CITGO 9 miyon florin. Pero esaki gobierno no ta bisa pueblo. Contrario, gobierno kier bende pueblo cu e a negocia tremendo y p’esey CITGO lo paga e impuesto ‘salbabida’ 10 miyon dollar. Cuanto mas di e regalonan a wordo duna caba na CITGO y pakico? Atrobe ban no lubida cu Lago Oil & Transport Company tabata paga alrededor di 40 miyon florin na impuesto di ganashi na 1985. Tempo cu ainda 100 florin tabata 100 florin.

E ta logico pa algun 100 cupo di trabou, cu miyones ta wordo regala na Valero y CITGO banda di exonera nan di cualkier obligacionnan pa daño ambiental? Esaki no ta logico y e no ta ‘make good business sense’ pa pueblo. Ni maske cuanto experto, manipulacion of intimidacion gobierno kier uza of aplica, e no ta klop!

Pueblo a wordo gaña na 2009 y 2013, cu e gobierno actual lo percura pa e refineria keda den operacion. Pueblo y parlamento a wordo pasa un ‘fastball’ cu e ‘Settlement Agreement’. Awor ta resulta cu gobierno no ta respeta locual a wordo palabra y cu e ta kibrando e ley cu a sanciona e acuerdo aki sin consulta of informa parlamento di antemano. Un otro falta di respet pa parlamento y un otro muestra cu gobierno ta haci locual e kier, pasobra e tin un mayoria den parlamento. Esaki no ta democracia.

Dus cada dia e ta bira mas dificil pa no kere cu gobierno ta sirbi otro interesnan cu obviamente no ta esunnan di pueblo. Si gobierno no ta sirbi e interesnan di pueblo, anto e lo ta bon pa haya sa kende su interesnan si ta wordo sirbi.

Nos di partido ABO ta keda ripiti, cu prome cualkier acuerdo wordo firma cu CITGO/PDVSA, laga pueblo mir’e y husg’e. Pasobra un gobierno cu no por respeta locual el’a palabra of firma p’e, den entre otro e ‘Settlement Agreement’, pueblo no por tum’e na serio. E ‘Settlement Agreement’ ta mustrando awor cu e tabata un otro triki pa sirbi interes di Valero y di algun hende cu tin interes personal y directo cu e refineria. Pueblo no por cay atrobe pa e mesun cabay di campaña!


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co