Parlamentario Sneek a usa loke ta cumbini e den su comparacion di gastonan entre AVP y MEP. 

Algun dia atras Parlamentario Sneek a bin cu un ponencia dilanti cu segun su cifranan 7 minister bou Gabinete Oduber lo a costa mas cu 9 minister di AVP. De facto nos a anticipa cu partido AVP lo a bai manda un representante pa bai purba troce e berdad cruel cu Gabinete Eman su 9 minister a plunder caha di gobierno y laga nos pais desangra financieramente.

Loke parlamentario Sneek no a logra trece dilanti den su ponencia of kizas su limitacion den conocemento riba e tereno financiero a strobe ta e hecho cu e bedrag menciona bou di Minister di husticia no ta corecto y nos lo splica tambe dicon. Nos di oposicion semper a haye importante pa mustra riba e hecho cu e “bureaunan di 9 ministernan” ta extra peso pa pueblo di Aruba y ta pesei nos a presentanan graficamente pa pueblo despues di a studia e presupuesto 2016 debidamente. Contrario na e caso di Parlamentario Sneek e ta obvio cu e la djis tuma un cifra sin bai verifica kiko tin tras di dje anto asina kier pretende di ta papia berdad siendo cu e ta purba tira un para crioyamente bisa.

Den e grafico cu parlamentario Sneek a waya cune den conferencia di prensa bo ta wak cu den tempo di MEP (segun su dato limita) lo tawatin 55.2 miyon na gasto di e 7 “bureaunan”. Den nan e ministerio di Husticia tawata mustra un suma di alrededor di 27.4 miyon florin. Cualkier persona cu ta pensa racionalmente y logico lo busca pa haya sa dicon e bedrag ta asina halto of verifica si esaki enberdad ta e costonan pa un “bureau”.  

Loke parlamentario Sneek aparentemente no sa ta cu e bedrag aki tawata parti den 4 departamento/oficina  cualnan ta  1) bureau Minister Husticia 2) Cuerpo Especial Arubano 3) Dienst P&O y 4) Instituto di Alarma IASA. Esaki caba por clarifica y bari for di mesa cu e cifranan presenta door di parlamentario Sneek no ta cuadra cu realidad. Si bo tuma jaarrekening 2010 di pais Aruba y repasa e cifranan comparativo di 2009 (mira anexo I) bo ta constata cu e costo pa bureau di husticia na 2009 tawata 3.1 miyon florin  (cual ta 1.5 miyon menos compara cu AVP na 2010). Teniendo e dato aki na cuenta ta nifica e ora ey cu e diferencia  24.3 miyon (27.4 miyon -/- 3.1) ta pertenece na e otro departamentonan a) Cuerpo Especial Arubano,  b) Dienst P&O y c) Instituto di Alarma IASA cual a wordo segmenta y presenta diferente den e jaarrekening 2010 cu ta ilustra cifranan di e prome anja di gobernacion di Gabinete Eman.

Pueblo por conclui den e grafico cu Sneek a usa tin un eror grandi y aparentemente e la usa loke ta cumbini su fraccion y Gabinete Eman. Door di esaki nos a reconstrui y coregi e tabel di dje, consecuentemente e gastonan cu e la ilustra pa MEP lo baha y yega un total di 30.1 miyon pa tur e 7 ministernan di gobierno di MEP y ora di hasi un comparacion cu e anja 2016 di AVP bo lo constata un diferencia di 15 miyon mas! No ta por nada nos di MEP ta vociferando cu 9 ministerio ta desangrando Aruba financieramente! Awor pueblo por comprende dibiaha cu nos pais ta hinca den un dilemma financiero asina grandi door di representantenan di pueblo cu no solamente ta iresponsabel ora ta trata di eherce nan trabou pa controla gobierno pero tambe ta incapas riba e tereno di finansas!

Expresionnan haci den e articulo aki no necesariamente ta refleha opinion di ArenaPoliti.co