Mas y mas medida
Algun siman atras CBS den un comunicado a señala cu e aumento di tarifa di coriente mes a pusha inflacion den un solo luna. Ademas di esaki Banco Central di Aruba tambe a trece dilanti den su ultimo publicacion cu e consumidor a perde confiansa. Mi ta cita e siguiente frase : "Ora cu consumidornan a wordo puntra si nan entrada mensual ta yega pa cumpra mesun hopi cu 6 luna pasa , 83% a contesta NO!" Esaki ta un indicacion cla cu di berdad e placa di e ciudadano tin menos balor y ta hasta hacie dificil pa cumpra lo necesario. E medidanan vigente y e aumento di BBO desde 1 december automaticamente lo trece su efectonan inflatorio cune, pasobra e sistema di "schakel" no a wordo cambia door di AVP. Ta importante pa pueblo sa cu esaki ta solamente e comienso pasobra 2015 lo conoce mas medida directo y indirecto afectando e poder di compra, entre otro vuilheffing (Af. 26,50 pa luna), contribucionnan propio di AZV (paga pa receta medico, Eerste Hulp y dokter na warda) sin laga afor e efectonan di aumento drastico di tarifanan di schoolgeld pa menciona algun. Ta obvio cu tur esakinan lo tin un efecto cumulativo y lo bay preta tur ciudadano, cuminsando di esnan cu ta biba di un onderstand, minimumloon pero hasta e segundo clase lo bay sali perhudica malamente. 

Poder di compra
Den cuadro di esaki y anticipando cu cosnan lo bira mas peor pe ciudadano cu lo continua perdiendo su poder di compra, fraccion di MEP a presenta un mocion pa sigura e poder di compra di e ciudadano. E mocion principalmente a enfoca riba varios hecho cu gobierno lo mester a tene cuenta cu nan: ampliacion di e base pa cobra diferente tipo belasting, medidanan adicional durante e proximo añanan, aumento di tarifanan pa un gran parti di e ciudadano cu ta biba bou di entrada basico pa por sobrevivi y contribucionnan propio (AZV).  Esakinan ta algun punto cu hopi peso cu a wordo treci padilanti. E mocion di fraccion di MEP a urgi gobierno pa introduci un "prijscompensatie" unda cu e ciudadano ora di inflacion lo no sigui bay atras. Lamentabel ta e hecho cu un parlamentario di AVP durante di su stemmotivering a expresa cu nan ta mira e banda positivo di esaki pero ta duna gobierno beneficio di duda den su maneho lagando e ciudadano na caya! Ta un decepcion cu e fraccion di AVP a nenga di sigura e poder di compra di e ciudadano pero si ta core yama un reunion den 6 minuut pa reglanan propio beneficio! 

No tin control di prijs
Nos di oposicion ta lamenta e hecho cu partido AVP a haya un oportunidad real pa para pa e ciudadano den temponan dificil pero a opta pa ignora e dolor di un pueblo votando CONTRA e mocion pa mantene poder di compra! E partido cu supuestamente ta propaganda cu nan a inverti den e ser humano ta e promer pa corta e hala afectando tur famia economicamente sin brinda un alivio. Mester remarca cu durante cambionan haci den e ley di inkomstenbelasting a elimina e parti di "inflatiecorrectie" pa e belastingplichtige cual ta nifica cu e ciudadano lo no goza di esaki pa cuida su poder di compra. No ta un secreto cu na e momentonan aki no tin control di prijs riba productonan na supermercado tampoco un canasta basico decente.  E conclusion cu pueblo mester saca di esaki ta cu partido AVP a laga pueblo den su totalidad na caya y no kier a sigura poder di compra. Siendo cu nan si ta hayando nan ahustacion anualmente pa no cay atras. Fraccion di AVP a admiti cu e ta algo bon indicando cu di berdad e medidanan lo afecta tur hende pero a djis keda man crusa desaprobando e mocion aki! Awor ta keda na comunidad di Aruba pa evalua e tipo di representante di pueblo cu fraccion di AVP ta y pa wak cu hopi biaha e fraccion di AVP ta pretende di ta cu pueblo pero den realidad nan ta co-autor pa perhudica e ciudadano!

Expresionnan haci den e articulo aki no necesariamente ta refleha opinion di ArenaPoliti.co