Evelyn Wever-Croes (MEP): Cada caso di abuso sexual ta uno dimas
STA CRUZ -- Evelyn Wever-Croes, lider di MEP, den conferencia di prensa a para keto na e problema den nos comunidad di abuso sexual di muchanan.
"Cada caso di abuso sexual di un mucha, ta uno dimas. Muchanan ta wak nos como adulto pa protehe nan di tur maldad, y cada biaha cu un mucha wordo abusa sexualmente, ta culpa di nos como adulto. Pesey nos mester actua awor. No keda keto ora bo mira algo asina. No keda sin denuncia ora bo ta victima. Lanta para y resona bo voz.
MEP
Nos fraccion, ya desde 2010 ta bogando pa castigonan mas severo den nos leynan pa abusador sexual. Ta inaceptable cu nan ta haya castigonan asina abou, mientras cu e mucha su bida ta wordo afecta pa semper. Pesey, desde cu un mama a acudi na Parlamento na anja 2010, cu 11 mil firma, pa pidi pa castigonan mas severo, nos a traha un ley di iniciativa cu castigonan mas severo y pa prolonga e periodo cu un acusacion asina por caduca. Lamentablemente e ley aki no ta carga sosten di AVP.
Fraccion di MEP a entrega tambe varios mocion pa urgi Gobierno pa atende cu e tema aki, pero manera por mira riba e documentonan adhunto, fraccion di AVP a vota CONTRA.
AVP
Sinembargo pa motibonan puramente partidista, e mayoria den Parlamento no ta sostene e cambionan aki den ley, y pesey nos no por mira cu abusadornan sexual ta haya castigonan mas severo. E cambionan cu si a wordo hasi den Codigo Penal no a duna e resultadonan, y pues no tabata efectivo.
Minister Hooijboer, cu tabata encarga cu asuntonan social desde 2009 pa 2013, a duna di conose cu abuso sexual di menor no tin su prioridad, pasobra no ta hopi mucha ta wordo abusa sexualmente.
E pensamento di partido AVP ta incomprendible. Unico cos cu nan ta bisa ta cu "no por"
REUNION PUBLICO DEN PARLAMENTO
Fraccion di MEP SI POR y lo pidi un debate publico den Parlamento cu ministernan encarga cu asuntonan social, salubridad y husticia, pasobra ta ora pa pone e tres ministernan encarga sinta hunto pa bin cu un solucion. Si di nan mes nan no por duna prioridad na e topico aki, Parlamento mester duna nan e señal pa bin cu un solucion. Den e reunion aki nos lo propone na Gobierno e solucion den e vision di MEP:
- pa Gobierno traha un plan concreto con por ataca e problema aki;
- pa Gobierno bin cu un Protocol relaciona cu un solo Meldpunt, caminda tur casonan di abuso sexual contra menor mester wordo atendi
- pa Gobierno pone medionan financiero disponibel pa por atende cu e problemanan cu tin den coordinacion entre e diferente instancianan, pa asina garantisa cu prueba di e delito aki ta wordo cumula efectivamente, cu por condusi na castigonan mas halto
- pa Gobierno apunta un 'vertrouwensarts' (dokter di confiansa) pa atende cu victimanan y nan famia
- pa Gobierno cuminsa cu un campaña di concientisacion pa cu e problema aki, y dirigi riba prevencion
Expresionnan haci den e articulo aki no necesariamente ta refleha opinion di ArenaPoliti.co
Articulo similar
7 motibo pa laga Pueblo eligi su Gabinete
Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...
Sigui lesa...