Pueblo por ta orguyoso di ELMAR N.V. y vision di Gobierno. 

ORANJESTAD – Minister di Energia y encarga cu companianan estatal di utilidad, ing. Mike de Meza a sali masha satisfecho di e presentacion ricibi ayera mainta di parti di N.V. Elmar y relacion cu e proyecto di Smart Grid. Hunto cu coleganan Ministe Eman y Sevinger, Minister de Meza a ripara e avancenan y tambe e potencial grandi cu ta nifica pa servicio na consumidor como pa e propio operacion di e compania distribuidor di electricidad.

E cambio di puntonan di luz publico existente pa LED, como tambe instalacion di puntonan nobo a cuminsa caba, continuando cu e prome fase cu a tuma luga durante ultimo dos aña. E plan ta cubri henter Aruba, for di Noord te San Nicolas y den e districtonan principal manera Santa Cruz, Dakota, Paradera, Savaneta, etc. segun Minister de Meza.

“E ta algo sumamente grandi y interesante. Nos ta wak cu ya caba tin rond di mil luz poni di 12 mil total cual 9 mil ta pa cambia puntonan existente y tin otro 3 mil cu ta bay den diferente area cu no tin iluminacion dus nan ta haya luz nobo,” e mandatario a splica. “Esaki ta algo sumamente importante pa bida socio economico, pa e siguridad cu mester reina den cada un bario; ora bo tin iluminacion e ta yuda masha hopi den esey, pero tambe pa e gevoel di e ciudadano.”

E mandatario a señala cu ta trata di un programa hopi grandi caminda den dos aña, Aruba lo ta 100% riba LED pa cu luz di caya. Esaki ta e prome y unico pais cu su iluminacion publico ta totalmente riba LED. E tecnologia ta uno cu ta brinda hopi mas intensidad di luz, pero di otro banda ta spaar hopi mas energia. E por spaar un 40% di consumo compara cu e luznan convencional.

Otro parti hopi interesante di e proyecto ta cu for di sede di ELMAR N.V. por monitoria cada un di tur 12 mil luz y mira ora ta presenta un problema, kico e ta y tambe por baha (dim) nan tambe, entre otro posibilidad.

Minister Ing. de Meza a indica cu pueblo di Aruba lo ta orguyoso di mira con Gobierno ta implementa un sistema nobo asina y ta forma parti di e plan total 2020 pa bay 100% riba energia alternativa pa nos haci un uzo mas eficiente di nos consumo di energia.  

“Mi ta felicita ELMAR N.V. cu e trabou grandi aki. Bo ta mira cu e profesionalnan di ELMAR N.V. ta haciendo un trabou tremendo; hopi admiracion di nos parti. Pueblo di Aruba den e proximo lunanan ta bay mira trucknan di ELMAR N.V. ta pone luz den bario. Nos sa cu tur hende kier y vooral esnan cu no tin, tin pura pa hay’e, pero ta haciendo maximo esfuerso pa tur hende haya lo mas pronto posibel,” asina Minister Ing. de Meza a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co