Dia 1 di Februari 2016 fraccion di Movimiento Electoral di Pueblo (MEP) a entrega un mocion di desconfiansa contra Minister Arthur Dowers y Benny Sevinger mirando e mal maneho den e dos ministerionan aki. Fraccion di AVP a vota contra esaki sabiendo cu nos pais ta bibando den un decadencia total na man di e dos ministernan aki. Minister Dowers a contradeci su mes asina hopi cu henter su maneho ta uno basa riba mentira y falta di transparencia. E minister aki ta bisa cu e lo pidi mas placa pa su Ministerio pero e ta lubida cu e gobierno cu e ta forma parti di dje a haña 2.7 Biyon florin extra desde 2009. Pues e minister publicamente ta bisa cu e prioridadnan di GE I y II tabata incorecto pasobra e 75 miyon florin pa Husticia no ta suficiente. Cos a yega asina leu cu e Minister di Turismo den persona di Otmar (9 Punto) Oduber a bay Gobernador pa entrega su retiro door di e mal maneho di Husticia cu ta perhudicando su Ministerio hunto cu esun di Benny Sevinger. Pues mustrando claramente di ta forma parti di un Conseho di Minister defacto y inepto.

Varios departamento den husticia e.o KIA, IASA, Dimas y KPA ta pasando den momentonan sumamente dificil bao di e gobierno di Mike Eman. Hasta e sindicato di Polis mester a reuni cu e Minister di Turismo pa wak con por yega na solucionnan pa e ola di criminalidad den e sector hotelero. E sindicato ta recomenda nos cuerpo pa bisti vest di siguridad. A baha overtime di polis, a cera Guarda Nos Costa, a elimina e radarnan y tambe e helicopter. Mirando tur e problemanan den husticia nos por conclui cu MEP tabata tin rason di entrega un mocion di desconfiansa contra Minister Dowers. 

Na KIA tur cos por, prisonero ta huy, ta haña droga, celular y hasta Glock. Un prison totalmente afgekeurd. Varios rapport ta keda scondi pa Minister Dowers relaciona cu e siguridad di nos cuerpo di cuidadornan di preso y di e presonan den e instituto. Varios gremio manera AHATA y FTA a sinta cu e Minister pa duna nan recomendacionnan con pa ataca e problematica aki. Nos pais ta den un decadencia total y nos conciudadanonan no tin siguridad personal mas. Varios bario a cuminsa lanta "Neighborhood Watch" pasobra Gobierno no ta percura pa frena e criminalidad y atraconan den nos pais. Ta hopi alarmante e cantidad di hoben y muchanan cu ta wordo gara cu arma di candela.

Asina mes Minister Benny Sevinger kier cambio den e ley di LTU y scrap e Swiss model di 2006. Minister Sevinger a parti mas di 90.000 m2 na un grupito liga na AVP. Awo e ta bezig cu e tereno na nos ex-Waf na Oranjestad. Un maneho cu ta liña recto cu interes di esnan biba na Aruba. E minister aki tin mas di 9 caso perdi den corte y kier cambia e ley di ROP desde 2009 pa acomoda su proyectonan contra interes general. Dos Minister cu mester entrega nan retiro per direct pa e desaster ocasiona contra interes di Aruba su pueblo. Despues di a entrega nos Autonomia Financiero awo nan ta entrega nos Siguridad Nacional. Hasta cuando, pueblo!

Expresionnan haci den e articulo aki no necesariamente ta refleha opinion di ArenaPoliti.co