ORANJESTAD – Ley pa reapertura di Refineria di Aruba a yega Parlamento dos siman pasa y dialuna merdia Parlamentarionan a start e debate importante aki pa Pais Aruba. Minister di Economia, Comunicacion, Energia y Medio ambiente ing. Mike de Meza a habri e reunion, contestando preguntanan entrega pa parlamentarionan e simannan cu a pasa. Durante su contestacion, sr. de Meza a duna tambe un splicacion detaya di e proceso largo y e esfuersonan cu a haci pa logra reapertura di e refineria cu diferente compania regional y internacional. De Meza despues a duna un splicacion extenso tambe di e negociacionnan largo cu a haci cu CITGO te cu awe Aruba ta asina leu cu e ley pa reapertura di e refineria ta na Parlamento di Aruba.

Den un sala completamente yen Parlamento dialuna den oranan di merdia a cuminsa trata e Ley di CITGO pa por cuminsa cu e trabounan den e refineria. Minister Mike de Meza, encarga cu Asuntonan Petrolero a papia un poco mas cu un ora largo, dunando un splicacion di henter e proceso. El a bisa cu tabatin casi 40 hende cu a yuda den e negociacion cu tanto CITGO como Valero pa yega na e acuerdonan cu awor ta den Parlamento pa aprobacion. Hopi enfasis a wordo poni cu pa prome biaha Aruba ta doño di e refineria. Y na final a bisa cu "pa algo cu ta asina importante tur hende den Parlamento mester para hunto".

Minister Mike de Meza papiando di e reto grandi cu Gobierno a haya su mes confronta cu ne despues di cierre di e refineria a bisa cu “e no tabata facil pasobra mundo tabata pasa den un crisis serio pero tambe den mundo petrolero tabatin retonan sumamente grandi. Nos a pasa den un Pasco hopi preocupa y pensando con pa salba e cuponan di trabou.” Esaki ta un parti di e historia di ciere y reapertura di e refineria cu Minister a papia riba dje den Parlamento. A logra sinta na mesa cu Valero y papia riba tur e casonan cu tabata den arbitrahe e tempo ey y a logra un reapertura, pero no a dura mucho debi na circumstancianan internacional economico desfaborabel cu tabata existi.

Minister de Meza a bisa tambe cu e reapertura di e refineria ta hopi importante pa San Nicolas, pa distritonan pariba di brug y pa Aruba en general. Pero tambe cu ta personanan di tur partido a traha y lo bay traha den e refineria cu CITGO ta encarga cu su operacion. “No tin un persona den Parlamento cu no tin un familiar cu no a traha den e refineria. E ta hopi mas cerca di loke nos tur ta pensa. E ta hopi importante pa e distrito di San Nicolas. Ora cu e refineria a cera tur hende por a mira e efecto pa e distritonan pariba di brug. Personanan cu ta sostene tur partido politico lo bay traha den e refineria aki.  

E mandatario a desbarata e show politico cu oposicion kier a bini cu ne riba e punto di garantia. No tin garantia cu Gobierno tin cu bay firma cu of pa CITGO. E ta simplemente cu na momento cu CITGO sinti cu e ta wordo stroba den su operacion, e por haci su demanda pa permitie haci su operacion sin ningun molester. E por bay Corte y pidi pa daño cu el a sufri den su operacion, pasobra el a inverti miyones. Pa Aruba no ta responsabel, a logra negocia pa esaki no ta nunca mas cu 300 miyon dollar. Esaki lo yuda tambe evita cu Gobernantenan cu por pensa pa strobe e refineria di keda den operacion. Di otro banda el a señala cu si CITGO stop su operacion, e mester paga Aruba 150 miyon dollar.

Drs. Paul Croes, minister encarga cu Asuntonan Social, di Hubentud y Labor, a hiba un discurso introductorio splicando e diferente puntonan di importancia pa tene cuenta cu ne relaciona cu e cantidad grandi di cuponan di trabou cu ta bin disponibel cu apertura di e refineria. Minister Paul Croes den reunion a bisa: “Mi kier reitera loke colega de Meza a bisa. Awe 26 di September, 216 ta un dia historico pa pais Aruba. Despues di 92 aña Aruba ta doño di e refineria. Danki na dedicacion di e Gabinete aki y colega Minster de Meza, Aruba ta doño di e refineria. Mi ta humildemente honra di por a forma parti di un proceso asina importante pa desaroyo di nos pais. Pa forma parti di un direccion economico, financiero y laboral  di henter e situacion importante na Aruba debi na esaki.”

Minister Croes a aplaudi e hecho cu su colega no a gasta miyones pa busca expertonan di afo, pero a haci uzo di hendenan local. Pa cuminsa e elogio tabata pa Minister de Meza mes kende, el a bisa, cu hopi tactica a busca un solucion pa e refineria. E por a bay Merca busca Abogado, cu ta costa miyones, pa haya e reapertura. Pero el a apunta personanan local pa dun'e e guia y conseho riba diferente tereno. Esaki ta loke Minister di Labor drs. Paul Croes a bisa den su disertacion den Parlamento durante tratamento di e ley pa reapertura di e refineria. “E reapertura ta hopi importante pa tata y mamanan di Aruba y ta papiando di 3 mil cupo di trabou den e prome 3 a 4 añanan.”

Parlamentarionan di diferente fraccion a haci nan pregunta y despues di 9’or Presidente di Parlamento drs. Mervin Wyatt Ras a schors e reunion te diamars mainta.

Expresionnan haci den e articulo aki no necesariamente ta refleha opinion di ArenaPoliti.co