Elton Lioe-A-Tjam (ABO): Confirmacion cu COLONISACION y ENTREGUISMO semper tabata e metanan real
Diabierna 7 October 2016, durante e show ‘CITGO’ dilanti un borchi na entrada di e ‘Mehorador’, pueblo por a experencia algo di e bida diario na Venezuela. Intencionalmente nos gobierno ‘Makelaar’ cu su parlamento ‘Pabien’, a crea un plataforma pa laga un bishitante, como representante di ‘PDVSA’, hiba un discurso politico riba nos isla. Un discurso di un modelo politico, cu no a resulta asina faborabel pa Venezuela. Un discurso populista cu e solo meta pa indoctrina y condiciona algun Arubiano, manera a sosode na Venezuela. Si gobierno no tabata na altura di antemano di e contenido di e discurso, e mester a para e bishitante na momento cu a sali na cla cu e discurso tabata uno politico y cu esaki tabata un metemento directo den asuntonan interno politico di nos pais. Pero enbes di haci lo corecto, e bishitante a haya, felicitacion, brasanan y sunchinan di nos politiconan entreguista na final di su discurso. ‘Bon Trabou, Pabien’. Algun frasenan di e discurso politico, cu ta confirma cu nunca e apertura di e ‘Mehorador’ tabata e meta berdadero:
‘Principionan socialista di revolucion Bolivariano a inspira reapertura di refineria’;
‘Esaki basa riba e doctrina nobo di e gobierno Bolivariano’;
‘Un pueblo so, un cultura so y un interes so’;
‘..e mision importante di construi un solo pais y un patria so’;
‘E echo cu nan por habri e refineria aki ta apenas un prome paso. Cu un gobierno mester traha pa su pueblo y semper mester traha pa busca felicidad maximo pa nan. Y ESAKI TA NOS META. Y MI TA KERE CU AKINAN NOS LO BAY LOGRA’!
Pues e bishitante, como representante di ‘PDVSA’ a bisa e pueblo Arubiano claramente cu e ‘doctrina’ pa ‘construi un solo pais y un patria so’ a cuminsa, y cu esaki ta e ‘meta’ cu nan lo bay ‘logra’.
E manera con ‘nan’ lo bay ‘logra’ esaki, ta cuminsa cu e cumpramento di e clase politico tradicional y debil. Despues ta sigui e proceso di indoctrinacion di un parti di e pueblo pa no mira e realidad of e berdad. Mientras cu silenciosamente hopi Venezolanonan lo establece nan mes permanente riba nos isla cu ayudo di e politico tradicional entreguista y traves di matrimonionan ficticio. Ultimo eleccion, mas di 18.000 mil hende cu no a nace akinan, por a vota (5 asiento). Y manera practicanan di intimidacion, materialismo y cumpramento di voto a bira algo comun aki na Aruba pa gana eleccionnan, e lo no dura mucho tempo mas cu esunnan cu no a nace akinan, lo domina e proceso democratico pa asina Articulo 14 di e ‘Constitución de la República Bolivariana de Venezuela’ por wordo activa.
Articulo 14:
‘La ley establecerá un régimen jurídico especial para aquellos territorios que por libre determinación de sus habitantes y con aceptación de la Asamblea Nacional, se incorporen al de la República’
Pues nos gobierno ‘Makelaar’ cu su parlamento ‘Pabien’, mediante e bishitante como representante di ‘PDVSA’, a confirma pueblo durante e show ‘CITGO’ di 7 October 2016, cu COLONISACION Y ENTREGUISMO semper tabata e metanan real tras di e apertura di e ‘Mehorador’. Tur otro asunto di ‘salbacion’ economico y trabou, tabata un mentira!
(www.aboaruba.org, This email address is being protected from spambots. You need JavaScript enabled to view it.)
Expresionnan haci den e articulo aki no necesariamente ta refleha opinion di ArenaPoliti.co