Partido AVP kier sigui manipula mente di pueblo! 

Recientemente partido MEP a emiti un comunicado caminda a ser treci padilanti cu e debe cu  Gabinete Eman tin na APFA a crece den forma astronomico y cu esaki ya a yega na un suma di casi 900 miyon florin. Riba e ponencia aki tanto minister Angel Bermudez como parlamentario Marlon Sneek a reacciona bisando cu locual MEP a trece padilanti ta un mentira ya cu na ningun momento so Gabinete Eman tin e debenan cuantioso aki na APFA, pero locual tin ta “un suma di 875 miyon florin cu a wordo inverti den instrumento di gobierno”. Un ridiculez di marca mayor, ya cu bisando esaki ta mustra un biaha mas cu e gobierno aki ta campeon den hinca palabra y frasenan bunita den otro p’asina tapa e situacion real cu nos pais ta aden. Awor e manipulacion a yega asina leu cu gobierno ta insinua cu tur e debenan cu e tin na APFA no ta debe mas, pero mester wordo considera como inversionnan di APFA den gobierno.

No por sigui fia mas
Pa comproba con Bermudez y Sneek kier sigui manipula mente di pueblo bisando cu Gobierno no tin debe na APFA, adhunto MEP ta produci un tabel cu ta aparece den e Jaarverslag 2015 di APFA, caminda riba pagina 79 por lesa: “Specificatie van de totale schuld van het Land Aruba aan APFA per 31 december 2015” y cual debe ta suma na 819.5 miyon florin. Pues aki por mira claramente cu no ta MEP no ta papia e berdad, pero ta e propio APFA ta considera e suma astronomico aki como debe total di gobierno na APFA. E categorianan cu mas ta resalta ta e Overheidsleningen (395 miyon florin) y Staatsobligaties (388 miyon florin). Pues e Leningen y Obligaties aki ta debenan di gobierno y no mester duna e bestia mahos aki un otro nomber! No mester lubida con tur e deficitnan financiero a ser crea durante e ultimo 7 añanan y pa cual Gabinete Eman a fia y sigui fia tur aña cerca APFA p’asina tapa e buraconan financiero. Alavez locual Bermudez y Sneek no ta bisa pueblo ta cu – segun a ser declara den e ultimo reunion di APFA na Cas di Cultura - di awor en adelante APFA mes lo no bay cumpra obligaties (bononan) mas di gobierno. Pues gobierno lo no bay tin lechi mas pa chica for di e baca cu yama APFA!  

Interes astronomico
Tambe den su reaccion ultimo Minister Bermudez a trece padilanti cu “e inversionnan cu APFA tin den Gobierno ta genera un entrada total di rendimento di 52 miyon florin pa aña”. Sin duda cu esaki ta beneficia APFA, pero si Bermudez ta sincero cu su mes y cu pueblo e mester a bisa acerca cu su Gobierno tur aña ta sinta horca cu pago di interes enorme di tur e debenan cu su gobierno a crea, ya cu den forma descabeya nan a redobla nos debe nacional den apenas 7 aña. Y tabata hustamente e propio Minister Bermudez aki  algun siman pasa a sclama den Parlamento cu e suma total di interes cu gobierno tin cu paga tur aña ta demasiado halto y lo yega 215 miyon florin na 2017, esta casi 600 mil florin pa dia na interes so! Hecho ta cu e pago di interes aki ta come un quinta parti (20%) di e entradanan total di gobierno y esaki ta impedi gobierno di inverti den otro sectornan di comunidad!

Finalmente mester conclui cu MEP na ningun momento so a trece un mensahe falso y manipula  padilanti, pero cifranan oficial di APFA mes ta duna MEP tur razon pa confirma cu gobierno di AVP tin un debe astronomico na APFA y cual debe tin cu wordo paga pa e generacion aki y futuro generacionnan.  

Expresionnan haci den e articulo aki no necesariamente ta refleha opinion di ArenaPoliti.co