STA CRUZ – “Den ultimo dianan nos ta wordo acerca pa hopi hende cu no sa pa cual partido nan vota. Varios ta e personanan cu tabata MEP, pero pa un of otro motibo a bandona e filanan di MEP. Awor, mirando tur e problemanan den nos pais, nan ta realisa cu AVP nunca mas. Especialmente e situacion di criminalidad, y inseguridad cu nos ta bibando aden. Tambe costo di bida cu a bira asina caro bou e gobierno aki tin hopi hende den problema. Otro factor cu ta pone hendenan disgusta di e gobierno actual ta e tantisimo corrupcion y actonan dudoso cu tin. Y mas cu tur cos, tur e pleitonan cu tin den e partido AVP. Hasta dal nan ta dal otro den nan discusionnan, y insulta otro na forma masha mahos mes.
Nos ta wordo acerca pa personanan cu kier papia, expresa nan mes, y wordo informa, y den nomber di MEP mi ta extende un brasa na tur cu ta den e situacion aki Especialmente e personanan cu ta defrauda debi na tanto pleito den e partido na mando, ta hopi confundi”, líder di MEP a duna di conoce.

MEP mes mester a bai bek na su raisnan: principionan social democrata, den cual semper ta pone e ser humano central. E ser humano ta wordo poni central riba tur tereno. Hasiendo nos país sigur bek pa tur hende por biba trankil. Brindando un cuido di salud drechi, den cual e ser humano ta central, y no cuanto e tratamento ta costa. Bin cu control di prijs pa asina por tene prijsnan di productonan básico abou. Baha edad di pensioen di biehes pa esnan cu no por traha te 65 anja. Poniendo finansas di país na orden, pero den un forma humano. Claro cu mester percura pa baha gasto y baha debe, pero e ser humano no ta esun cu mester wordo sacrifica. E decisionnan di gobierno pa por ehempel corta subsidio di nos muchanan special, di nos muchanan cu no tin un dak riba nan cabes, den nos grandinan, ta decisionnan equiboca, y mester wordo coregi.

“Nos partido a pasa den un proceso largo y pisa di cambionan, pero awor nos ta cla pa ricibi tur hende cu brasa habri. Esnan cu semper a sostene nos, y tambe e personanan cu no a sostene nos den pasado, y awor kier deposita nan confianza den partido MEP. Tur ta bon bini cerca nos” líder di MEP a duna di conose.

Expresionnan haci den e articulo aki no necesariamente ta refleha opinion di ArenaPoliti.co