ORANJESTAD- Prome Minister Mike Eman hunto cu director di DOW, un ehecutivo di SETAR, director di Arubus y manager di Aruparking y director di OBID a presenta na un rueda di prensa unda a papia riba caya grandi, e cambionan cu ta bay tin y pa splica kico ta bay ta e actividadnan cu tin durante henter luna di december.  Esaki en conexion cu dianan di fiesta cu ta dilanti porta. E actividadnan ta hopi, ta varia y ta yuda den mantene e centro di ciudad bibo y duna e comerciantenan un estimulo pa loke ta benta di nan productonan.

Eman a splica cu ta bay flexibilisa e oranan di parkeo.  Desde 14 di november for di 3'or di atardi te 6'or parkeo ta bay ta gratis den centro di ciudad. "Sin duda esaki tin su impacto riba entrada di e compania aki. Na e momentonan aki ya caba Arubaparking tin perdida y mester busca incentivonan con evita cu e perdidanan aki no bira mas grandi." Eman a splica tambe cu e klem ta algo cu ta bay pertenece na pasado, ya cu esaki ta causando hopi molester cerca tanto e turista como localnan. E miho opcion ta pa duna esnan cu pasa over di nan tempo of ta mal staciona un boet y manda esaki na nan cas. Un klem, aparte di ta un mahos bista, semper ta funciona contra productivo.

Un otro  noticia agradabel ta cu ta bay instala WiFi den henter centro di ciudad. SETAR ta trahando riba esaki y ya cu e infrastructura t’ey caba, e servicio aki ta bay bira un realidad hopi lihe. Loke sigur tambe ta bay yuda cu e sistema di WiFi ta e matanan solar. Un ya ta full instala caba y e dos otronan ta den preparacion pa keda instala. DOW ta bay dorna henter caya Betico Croes cu adornonan di Pasco cu hopi iluminacion cu ta bay duna e luga un realce y un ofrece un panorama fantastico den oranan di anochi. Un otro punto cu ta pensando riba dje ta pa habri caya grandi pa laga autonan core anochi. Esey ta ainda den deliberacion.

Un otro punto ta cu artistanan lo duna presentacionnan musical pa deleita e publico cu ta haciendo compras. Pa esaki ta construi un podium unda e artistanan por presenta. LVV ta bay tene mercado manera cu tin actualmente na Sta. Rosa riba base regular. Asina ta cu e preparacionnan ta den full swing y tur cos ta mustra hopi alentador. Asina ta, prepara pa december!! 

Expresionnan haci den e articulo aki no necesariamente ta refleha opinion di ArenaPoliti.co