NAN A PAGA BELASTING HENTER NAN BIDA CABA. 

STA. CRUZ -- AVP a vota CONTRA e mocion di MEP pa baha e peso di belasting di pensionadonan. Lider di MEP Evelyn Wever-Croes a defende e causa pa elimina e belasting riba pensioen di biehes, pero AVP a vota contra.

Donny Rasmijn ta esun cu nan a manda pa defende e decision di AVP pa vota contra, y AVP a cuminsa cu cuestiona e conosemento y experiencia di lider di MEP Evelyn Wever-Croes, door di bisa cu bo no ta paga belasting caba riba pensioen di biehes.

"Cu tur respet pa sr. Donny Rasmijn su expertisio, ta bon pa mi corigi'e mesora. Mare tabata berdad cu bo no ta paga belasting riba pensioen di biehes.
Pero lamentablemente nan a informa sr. Rasmijn malo. 
Pensioen di biehes ta cai bou di e entradanan menciona den artculo 7 di e ley di Inkomstenbelasting, y pues bo mester paga belasting riba dje. 
Pesey bo mester yena e pensioen cu bo ta ricibi den e formulario di inkomstenbelasting na pregunta 14d "AOV-uitkering". Y ta pesey nos pensionadonan mester bai SVB busca e resumen anual pa yena nan formulario.
Ohala cu locual cu sr. Rasmijn a bisa den Parlamento tabata berdad, pasobra e ora e pensionadonan aki no tin mester di molestia nan curpa ta yena e formulario cada anja.
Pero e berdad ta diferente. 
E pensioen di biehes ta cai bou di e entradanan cu bo mester paga belasting riba dje. 
Si e pensioen di biehes ta bo unico entrada, e tarifa di inkomstenbelasting ta 0, pero e tarifa di AZV si ta 10.5%.
Si un persona tin un entrada adicional, e ora e dos entradanan ey ta cumula, y e pensionado ta haya su mes cu cobransa di 500 florin of mas. 
Esey nos kier evita. Nos pensionadonan a traha duro henter nan bida, y nan a paga belasting caba. Nos pensionadonan merese un bida trankil. Dicon AVP no ta realisa esaki? 

Pa loke ta trata sr. Rasmijn, mi no ta tum'e na malo, apesar cu ela' purba insultami. Pero mas bien duele mi ta haya di dje, pasobra den AVP nan tur ta haya instruccion di Mike Eman pa atacami. Clariska Velasquez mester a atacami cu mi casa, Melvin Tromp mester a atacami cu un juffrouw cu no a hasi ningun hende nada, y Donny Rasmijn mester a atacami riba mi experiencia di trabou. Ningun di e acusacionnan aki ta berdad, y ta tristo si pa mira con AVP ta prefera laga e parlamentarionan pasa berguensa, djis pa purba atacha mi credibilidad. Mi ta mas determina cu nunca pa sigi lucha pa baha e peso di belasting di nos pensionadonan, cu AVP kier of lag'i kier", lider di MEP a duna di conose.

Expresionnan haci den e articulo aki no necesariamente ta refleha opinion di ArenaPoliti.co