Si nos analisa e deterioro di Mike Eman y su partido AVP no a ked’e nada mas di purba crea un satelite politico den nomber di Forsa (Bobo) Nobo, e fusion perdedor entre Andin y Otmar. Mike sa cu su partido lo ta e gran perdedor den eleccion di 2017. Mescos a yega di pasa den pasado cu partido AVP den e añanan 70, ora cu su e partido a cay te na 1 asiento. Nos grandinan a castiga AVP pa nan mal maneho y esaki lo bolbe ripiti un bes mas cu nos generacion. 

E gran perdedor 
Andin ta e gran perdedor den e novela politico aki. Despues di a funda su partido 12 aña pasa, Andin ta laga e partido aki cay hunto cu tur hende cu a deposita nan confiansa den PDR pa uni cu un ex-Minister fracasa Otmar Oduber di Turismo/Transporte/Labor/Cultura y Sector Primario den Gabinete Mike Eman I y II. Alabez  ta un echo cu Andin a vota PRO e maneho di Gabinete Mike Eman pa tres biaha, pues casi 50% di e destruccion di nos pueblo. 

Turismo den deterioro 
Segun AHATA, turismo stopovers a baha e aña aki cu 29.8% na October compara cu aña 2015. E prome 10 lunanan di aña aki stopovers a cay cu 7% compara cu aña pasa. Turismo di Merca a cay den October, un luna malisimo pa nos hotelnan, restaurantnan y taxistanan y logicamente nos hendenan den e mercado di HORECA. Turismo di Venezuela no ta cos di papia mes. Un bahada di 76.7% na October di 40,387 stopovers den October 2015 pa 9,412 den October 2016. Tur di nos por corda e "raspa tarheta" cu Otmar y ATA tawata yama turista. Hasta den reunionnan den Parlamento Otmar tawata gaba cu e turistanan aki. Cu basicamente tawata perhudicando nos balansa di divisas como pais. Pero Otmar a hinca esakinan den su 1 Miyon bishitante na 2015. Turismo di calidad di Venezuela nos a perde pa Miami, pues un fracaso total pa loke ta e maneho di Otmar y ATA. Awo cu e baca a hoga na pos nan ta inverti den e mercadonan aki, hopi laat mirando tur e miyones den concierto cu placa di pueblo. Hasta e fondo di Emergencia Otmar a gasta, anto pakico???

Dictadura y intimidacion 
Hasta e ley di Otmar di All-inclusive a stroba varios hotel pa yena nan cambernan y tabata danki na e hotelnan tradicional cu nan esfuersonan a logra mantene nan hotelnan operacional. Cu yegada di Minister Mike De Meza nos por spera mas destruccion di nos unico pilar economico despues cu su lider di partido Mike Eman a priminti dos pilar economico durante 2009-2017 te awe nos ta draai riba Turismo y e deal spirito di Citgo. AHATA kier mas participacion den ATA y no un Minister dictador cu ta intimida tur hende, cu te hasta den Parlamento ta insulta Raad van Advies y bisa cu AHATA a soborna nos Prome Minister. Hotelnan a wordo priminti pa baha nan invoerrechten pa por renoba nan propiedadnan, e prijsnan haltisimo di coriente cu Mike Eman a priminti di baha na 2009 pero a AUMENTA e BBO/Environmental tax. Ta parce cu e timing di Forsa (Bobo) Nobo tawata perfecto pa scapa di e decadencia den nos turismo. Nos mester cambio den gobernacion, pasobra Gabinete Eman ta destrui tur cos den nan caminda y asina mes e burdugonan kier bin cu mas hotel dilanti aeropuerto pa cumpli cu nan sponsornan pa campaña politico.

Expresionnan haci den e articulo aki no necesariamente ta refleha opinion di ArenaPoliti.co