STA CRUZ -- Actualmente, tin miles di famia den nos comunidad cu ta bibando sin awa y sin coriente. Partido MEP a tuma contacto cu instancianan concerni pa mira con por yega na un solucion.

Hopi ciudadano na Aruba no ta na haltura cu ora cu coriente wordo desconecta, no mester acepta esaki sin busca un solucion y biba sin e comodidad di coriente. Tin manera pa cana serca Elmar mes.

Lider di MEP, sra Evelyn Wever-Croes a elabora riba e situacion aki durante conferencia di prensa semanal di MEP. 

“Un manera pa soluciona esaki ta pa aplica pa un meter prepago. Esaki por wordo duna bou di cierto condicionnan. Parti di e pagonan cu e cliente haci pa e meter prepago ta bay pa paga riba e debe existente. Esaki ta un manera directo pa soluciona cu e cliente keda cu coriente.” 

Lider di MEP ta indica cu MEP ta ricibi hopi kehonan di diferente persona cu e percentahe cu Elmar ta regula pa paga e debe biew ta hopi halto. Esaki den tur caso ta dal duro.

“Partido MEP lo pidi Elmar pa baha e percentahe aki pa e lunanan nos dilanti. E situacion ta hopi dificil y e contribucion di Elmar den esaki sigur lo por trece alivio pa hopi ciudadano. Tambe, Partido MEP ta bay pidi Elmar y WEB pa no corta mas meter di awa y coriente den e temporada di fiesta cu nos ta aden. Esaki lo duna e pueblo alivio y trankilisa nan pa nan no biba bou di e menasa cu nan lo pasa Pasco y Aña Nobo sin awa y coriente.
E puntonan aki pa Partido MEP ta sumamente importante pa nos traha riba nan. Ora cu nos ta cana den comunidad, diariamente nos ta topa ciudadanonan cu ta pidi nos pa yuda nan. Sinembargo, nos no tin e placa pa yuda nan pasobra ta sumamanan ta halto.
Pero SI nos tin e manera pa nos yuda esnan den mas nececidad pa sikiera nos por brinda nan ayudo pa nan no pasa e fin di aña sin coriente.
Nos lo manda un carta den e siman aki pa Gobierno, Elmar y WEB y urgi nan na un forma bastante insistente pa nan no corta mas meter di awa y coriente. Tambe Partido MEP lo sugeri pa nan duna e ciudadanonan concerni un areglo di pago un poco mas social.

“E realidad di e problema aki cu ta existi den nos comunidad ta hopi serio y grandi. Y locual cu ta haci mas dolor ta cu ta e muchanan mas tanto ta esunnan cu ta sufri cu e situacion aki. Adultonan por maneha e situacion miho. Nan ta comprende y por wanta e molester. Pero e muchanan no ta comprende y riba nan nos mester pensa”.
Riba e pregunta di prensa  kico lo ta e motibo cu varios famianan ta den e situacion aki, sra Evelyn Wever-Croes a menciona diferente motibonan pa cua famianan ta laga e situacion yega asina leu te cu nan no por cumpli cu nan pago cu e consecuencia cu coriente ta wordo corta.

Tin famianan pa motibonan imprevisto, manera entiero of otro gasto grandi, a bay atras pa un of dos luna.
Tambe tin un grupo di ciudadano cu no sa con pa maneha nan finansas na un manera adecua.

“Pero na final di dia, no ta importa kico e motibo ta cu e famianan aki no ta cumpli cu nan pago. E hecho ta cu ta nos muchanan ta esunnan cu ta sufri mas bou di e situacion dificil aki. Y Gobierno mester bin cu un plan pa asina trece alivio pa e famianan aki y brinda nan un forma pa asina nan por cumpli cu nan pago.
Ningun famia aki na Aruba mester pasa Pasco y habri Aña Nobo sin coriente”, ta e palabranan di sra Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co