Na februari di aña 2014 Dimas a publica e maneho nobo di admision pa stranheronan pa tur stranhero cu kier bin biba y traha na Aruba (Herziene Toelatingsbeleid Vreemdelingen Ministerie Ruimtelijke Ontwikkeling, Infrastructuur en integratie, Aruba, 1 februari 2014). Entre februari 2014 te cu awe  a bin hopi cambio  den e maneho aki riba menciona sin cu esakinan a wordo haci publico via medionan di comunicacion  of riba website di Dimas. Consecuencia di dje ta cu tin hopi inseguridad y inconsisencia di e maneho aplicabel na Dimas y  peor ainda,  ni e trahadornan na Dimas conoce tur e cambionan aki cu consecuencia cu hopi fout ta wordo haci cu permisonan na Dimas.

Conforme e maneho di admision actual tur persona cu tin tres permiso di trabou valido no tin nodo di bay DPL mas y nan por bay directemante Dimas pa pidi un permiso di trabou hasta si esaki ta trata di un cambio di trabou.

Conforme e maneho pa reunificacion familiar, tur stranhero cu tin tres permiso valido por pidi un prome permiso pa reunificacion familiar pa su casa y su yiunan. O sea si 3 aña pasa 1000 persona a haya un prome permiso na Aruba e aña aki nan por aplica pa permiso pa nan casa y nan yiunan. Ban asumi cu esakinan ta famianan di 1 casa y dos yiu, e ora nos ta papiando di un total di 3000 persona cu por imigra como familiar pa aña na Aruba.

Un otro tipo di permiso cu ta wordo hopi maluza ta esun di inversionista. Tur loke e stranhero cu kier aplica pa e permiso aki mester comproba ta cu e tin 40% di e accionnan (40 % shares) den e compania. E stranhero ta busca un stroman pa keda cu 60% di e sharenan den e compania, e ta pague algo pa luna pa esaki, pero e doño real mes ta e stranhero. E persona local cu ta fungi como accionista tambe hopi biaha ta fungi como director y no ta realisa cu e ta responsabel pa e compania aki legalmente. Dimas actualmente no ta exigi ningun tipo di comprobante cu e compania aki realmente ta existi ni tampoco ta exigi un comprobante di e inversion cu e compania aki lo haci na Aruba. Esaki ta crea e posibilidad pa tin companianan spoki (ghost) cu en relidad no ta ni opera djis pa e persona por haya un permiso. E otro problema cu esaki ta crea cu e ta habri e posibilidad pa stranheronan tuma over trabounan di  Arubianonan of di  personanan cu ya caba tin permiso pa biba y traha aki. E inversionista tin derecho pa aplica pa reunificacion familiar pa full su famia cual tambe tin como consecuencia un entrada grandi di mas stranhero na Aruba.

Manera cu boso por mira nos leynan di admision ta hacie posibel pa nos keda haya un avalancha di persona cu por bin biba y traha na Aruba. Esaki tin consecuencia grandi riba nos mercado laboral, economia, seguro medico, infrastructura y nos scolnan.

Gobierno di Aruba mester realisa cu si nan no bin cu un plan di maneho a corto plazo pa para e cantidad grandi  di inmigrante cu kier bin biba y traha na Aruba, algun di un forma legal y algun di un forma ilegal, esaki lo tin consecuencia devastador pa Aruba.

E consecuencia di no bin cu un paro na inmigracion y na e crecemento di e poblacion desproporciona, ta cu e nivel di educacion ta bay baha pa motibo cu tin mas y mas mucha den un klas, nan no conoce e idioma di Papiamento ni Hulandes cual ta kita hopi atencion di e maestro. E otro problema ta cu dor cu no tin suficiente cas social na Aruba hopi famia ta hayanan ta comparti cas y bo ta haya hasta 3 pa 4 famia bibando hunto den un cas cual no ta sano pa ningun hogar. E otro problema ta cu ora e economia stagna y companianan bay bancarota y nan manda hendenan cas e desempleo ta bay tin como efecto ladronicia y mas criminalidad.

E problema aki ta uno grandi y uno urgente y si nos no proteha nos isla pronto nos lo wordo sacudi cu avalancha di criminalidad y problemanan social cu lo tin un efecto negativo riba nos turismo cu ta nos unico pilar economico awor.

Expresionnan haci den e articulo aki no necesariamente ta refleha opinion di ArenaPoliti.co