Tur isla of pais ta progresa basa riba vision.  Den decada 50/60 sr. Juan E. Yrausquin q.e.p.d. a presenta su vision di e desaroyo di turismo. Ora el a corta sinta pa nos prome hotel ‘Aruba Caribbean’ Sr. Yrausquin a anuncia cu E ta mira Aruba su beach manera un Miami chikito……contrincantenan di AVP a cualifica sr. Yrausquin pa  loco y a informa pueblo cu  ‘kabritu di Noord lo drumi den e hotelnan’ !! Sr. Juan Yrausquin a declara e tempo ey tambe cu Aruba mester prepara pa ora e refineria LAGO sera su portanan….un declaracion pa cual el a worde critica severamente pele….Ki mishi cu Lago lo por sera su portanan ?  Tempo a duna sr. Juan Ε Yrausquin  q.e.p.d. y PPA razon. Turismo a bira Aruba su prome pilar economico. Aruba su beachnan ta parce un Miami chikito y Turismo a salba Aruba na momento cu Lago a sera su portanan. Tur esaki sr Juan E Yrausquin a keda reconoci como  e visionario  major di Aruba riba tereno economico y pesey e ta worde jama ‘Visionario major y Motor di Aruba su economia  !!

PPA como organisacion politico a sigui ta e partido visionario di pais Aruba !! Esnan cu pueblo a duna un mandato amplio  durante e ultimo 30 anja no a presenta un vision pa un di dos of di tres pilar economico. Al contrario hasta e actual gobierno a tuma over vision di PPA  cual PPA ta projecta pa basta anja kaba esta  ‘un Aruba como HUB den Caribe’  den cual e ‘streettrolley’ cu ta core for di haf pa Centro di Oranjestad pa no lubida e mudamento di nos Containerhaven pa Barcadera pa cual justamente x lider di AVP a cualifica como ‘un vision mucho grandi, mucho placa y no necesario pero PPA a sigui defende nos vision y awe el a bira realidad !

CENTRO DI ORANJESTAD ….CENTRO COMERCIAL/TURISTICO ?

Pero E pregunta actual ta ….Unda e actual gobierno di Aruba di AVP a faya ??  Di con centro di Oranjestad NO ta e  Centro commercial/turistico cu Aruba lo mester tin den e epoca aki ?? Contesta ta pasobra AVP como organisacion politico NO tabatatin su propio  ‘vision’ pa cu desaroyo di Aruba y di centro di Oranjestad y como tal bo por inverti hopi den Oranjestad pero si bo no a bende bo  vision cu mundo commercial/turistico bo no ta logra e vision cu bo ta pretende di tin !!

PPA ta kere fielmente den nos vision esta ‘Aruba como HUB den Caribe  entre Norte America y Sur America, entre Asia y nos region y entre Europa pa Caribe pa Sur – Centro y Norte di America’. Hopi por cuestiona nos vision pero PPA tin nos vision pa anjas…nos a worde ridiculisa atrobe….pero nos a mantene nos vision te cu awe otro cu a critica ta purpa presta nos vision pa nos nos usa otro palabra. PPA ta kere fielmente den e  rol importante cu ‘Oranjestad como nos capital  commercial/turistico y financiero’ lo por hunga den futuro. PPA ta convensi cu esaki riba su mes por desaroya su mes den un pilar economico extra pa nos pais esta un Oranjestad cu e.o. un Aruba World Trade Center etc.

PPA kier accentua ‘Oranjestad nos capital’ como centro commercial/turistico/financiero di nos pais. Pero un capital unda ta liber pa ‘parkeer’ y na unda lo no tin instancia cu tarea negativo manera Aru-parking pero un instancia pa duna sosten y informacion nan nos pueblo y nos bishitante ora nan bishita centro di Oranjestad !! PPA ta kere den un  vision di gobierno  cu ta projecta  cierto desaroyo den  Oranjestad. No cu comercio sin mas ta mara na vision di gobierno pero si unda comercio lo goza di cierto incentivo fiscal y otro si nan sigui e vision cu gobierno pone riba mesa !! PPA ta kere fielmente den desaroyo di e tereno cu a bin liber awor cu containerhaven a muda pa Barcadera lo mester worde usa pa duna Aruba e ‘maximo’ di ingreso posibel tanto na cupo di trabao di valor como na ingreso pa pais Aruba. Y den esaki PPA a projecta pa anjas kaba un Aruba World Trade Center combina cu un Universidad cu facultadnan e.o. na Idioma y IT y un of dos business hotels. E desaroyo aki lo tin un ‘spin-off effect’ riba otro desaroyo commercial/turistico den vecindario di e complex impactante aki. Mara na e complejo aki PPA ta visualisa desaroyo di un Haf Turistico combina cu fascilidad cu lo pas dentro di e totalidad aki. Tur esaki creando  e.o. cupo di trabao professional.

‘REACHING FOR THE STARS’

Tur esaki combina cu inversion pa cambia  producto Aruba ….locual PPA ta jama ‘reaching for the stars’.

• Diversificacion di nos producto turistico p/m di e.o. MCI (conventions), Golfdestination, Health & Wellness tourism, SN Our Caribbean Town, Yachttourism, etc
• Desaroyo di Aruba como HUB riba tereno di tele-comunicacion.
• Desaroyo di  ‘Barcadera Containerhaven y Free Zone’  …ja e actual gobierno a tuma over e vision aki di PPA mudando e containerhaven pa Barcadera y ta trajando e infra-structura necesario.
• Aeropuerto di Aruba como HUB di pasajero y freight.(esta mas inversion den e infra-structura necesario).
• Haf di Oranjestad como HUB pa desaroyo di ‘cruise-tourism’ y fascilidad cu lo impacta desaroyo commercial/turistico di Oranjestad manera e Aruba World Trade Center.
• Haf di San Nicolas lo por bira parcialmente  un container HUB pa container destina pa otro pais …pa esaki mester di un haf cu e profundidad di 16 meter of mas….pa por acomoda e ‘post-panama-vessels’ y na Aruba e haf di San Nicolas so conoce e profundidad aki. No kabe duda cu e transformacion di e refineria den un Upgrader lo strobe e vision aki parcialmente pero PPA no ta entrega e vision aki ainda.
• Un Television regional esta cu ta transmiti  noticia diario  di tur isla/pais den region pa cu otro !!

E actual gobierno di AVP a tuma over varios di nos vision pero no a conoce e profundidad di PPA su vision y como tal no ta logrando e impacto commercial/turistico cu PPA si lo por logra si nos worde duna e oportunidad pa  goberna.

Si PPA mester bisa cu nos vision ta un vision di ‘diez anja’ cual lo ensera inversion di tanto sector publico como sector priva pero na un forma responsabel. No kabe duda cu prome cu e proximo gobierno inicia cu esaki lo e mester trece cambio dentro di nos presupuesto pa nos por paga e ‘debe nacional’ cu e actual gobierno a crea pero cual resultado di nos presupuesto lo mantene e posibilidad di inversion den asina jama ‘ppp projects’ . PPA ta ripiti esaki solamente na forma responsabel esta e lo mester ta factibel y lo mester ta dentro di locual Aruba lo por paga den futuro!!  Pero esaki ta exigi bon vision y experencia y esey varios partido politico falta !!

Aruba,  3 di januari 2017    
Lider Politico di PPA
Benedict J.M. Nisbet

Expresionnan haci den e articulo aki no necesariamente ta refleha opinion di ArenaPoliti.co